Мустақиллик байрами арафасида Тошкент вилоятининг Чирчиқ, Бекобод шаҳарлари, Паркент, Юқори Чирчиқ туманларида кам таъминланган оилалар, жисмоний имконияти чекланган фуқароларга намунавий лойиҳалар асосида барпо этилган замонавий уйлар тантанали равишда топширилди. Бу ҳақда ЎзА хабар берди.
Ўзбекистон Президенти девонининг Фуқаролар ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати, вилоят ҳокимлиги масъул ходимлари, жамоатчилик вакиллари иштирок этган тадбирларда 4 нафар ногирон ва эҳтиёжманд фуқарога янги хонадонларнинг калити топширилди.
Чирчиқ шаҳрида истиқомат қилувчи Моҳира Қорабоевага Навбаҳор маҳалласидаги янги уйлардан бирининг калити берилди. Шунингдек, янги тикув машинаси берилиб, ишга жойлаштирилди.
Паркент туманида ўтказилган тадбирда тумандаги 46-умумтаълим макабида 21 йилдан буён дарс бериб келаётган Турсуной Нурсодиқовага Истиқбол маҳалласида янги қурилган 6 сотихдан иборат 4 хонали уй топширилди.
Жорий йил охирига қадар вилоятда ижтимоий ҳимояга муҳтож оилаларга яна 66 та уй-жой топширилиши режалаштирилган.
Шунингдек, Бекобод шаҳридаги 29 нафар ногирон ва эҳтиёжманд фуқарога янги уйларнинг бошланғич бадали Президент томонидан тўлангани тўғрисидаги сертификатлар топширилди. 180 нафар фуқарога ногиронлар аравачаси ва бошқа турли воситалар, 50 нафар фуқарога мамлакат тиббиёт муассасаларида даволаниш учун йўлланма берилди.
Изоҳ (0)