Сунъий онг соҳаси мутахассислари автоном ишловчи қуролни тақиқлашни талаб қилмоқда. Бу технологияга қарши эътироз билдираётганлар орасида Tesla раҳбари Илон Маск ҳам бор, деб хабар беради Meduza.
БМТга мурожаат шаклида очилган петиция матни «Ҳаёт келажаги институти» ташкилотининг сайтида жойлаштирилди.
Мурожаатни 116 киши имзолаган бўлиб, уларнинг бари сунъий онг соҳаси экспертлари ҳамда бу масала билан шуғулланувчи компаниялар раҳбарларидир. Жумладан, Tesla, SpaceX ва OpenAI асосчиси Илон Маск, Google’нинг сунъий онг ишлаб чиқиш бўйича лабораторияси раҳбари Мустафо Сулаймон, NaviRobot компанияси раҳбари Игорь Кузнецов ҳамда Promobot асосчилари Алексей Южаков ва Олег Кивокурцев петицияга қўшилди.
Мурожаат муаллифлари автоном тартибда ишловчи қурол таҳдиди ядровий ёки кимёвий қуролдан кам эмаслигини уқтирмоқда. Очиқ хатда гап биринчи галда одамнинг буйруғисиз ўт очиши мумкин бўлган технология ҳақида кетмоқда. Айтилишича, бундай қурол инсониятга жиддий таҳдид солади, унинг ишлаб чиқилиши этикага зид келади ва шу боис халқаро даражада тақиқланиши лозим.
Бугунги кунда автоном қурол аллақачон яратилган. Масалан, Жанубий Корея томонидан КХДР билан чегарада ўрнатилган автоматик туреллар шу гуруҳга киради. Техник жиҳатдан улар одамнинг аралашувисиз ўт очиши мумкин, лекин ҳали дастурий даражада одамнинг иштироки талаб этилади.
Бундан ташқари, турли ҳарбий компаниялар дронлар, автоматик пушкалар, гусеницали автоном роботлар устида ишламоқда.
Изоҳ (0)