Motorola Moto Z Force қурилмалари оиласи дарз кетишга қарши кучли ҳимояни таъминлайдиган ShatterShield технологиясига эга экранлари билан машҳур, деб ёзади «Hi-tech.mail.ru».
Қурилмаларнинг олд панели шишадан эмас, полимер материалдан қилинган. Албатта, унинг тирналиши осон, аммо қурилмани исталганча асфальтга ташлаш мумкин — экрани синмайди. Энди эса Моtо ушбу технологияни ривожлантириш устида ишлаётгани маълум бўлди.
Motorola рўйхатдан ўтказган патент яқинда ОАВлар эътиборига тушди, унда смартфон экрани қандайдир шикастланиш олса, уни ўзи таъмирлаб берувчи «ақлли шиша» янги технологиясини тавсифлаб беради.
Унда айтилишича, «хотира»га эга шишасимон полимер, яъни ўзига хос пластик, ўзининг дастлабки шаклини «эслаб қолади» ва муайян шароитларда уни қайта тиклашга интилиши мумкин. Дастурий таъминот экрандаги ёриқларни автоматик тарзда аниқлайди ва фойдаланувчига қайта тикланиш жараёнини ишга туширишни таклиф қилади.
Фойдаланувчи розилик берганидан кейин қурилмани бир четга олиб қўйиши ва бироз вақт ундан фойдаланмаслиги керак. Дисплейдаги қурилма компонентларининг махсус тўплами экранни қиздиришни бошлайди. Ҳарорат кўтарилганида «ақлли шиша» молекулалари дастлабки тузилмани қайта тиклаш учун тезроқ ҳаракатланади.
Motorola тан олишича, мукаммал қайта тикланиш ҳозирча имконсиз, аммо жараён «маълум бир деформацияни ортга қайтариш»га қодир. Яқин орада мобил қурилмалар экранлари «ўз-ўзини тузатиши»ни тахмин қилишга асос бор, деб ёзади нашр.
Изоҳ (0)