Шу йилнинг 12 сентябрь куни Ўзбекистон футбол федерациясида ҳисобот-сайлов конференцияси бўлиб ўтади. Футбол мутахассиси Алишер Никимбаев ўзининг Twitter микроблогида Халқаро футбол уюшмаси (ФИФА) ҳамда Осиё футбол конфедерацияси (ОФК) бундан воқиф этилгани ҳақида маълумот берди.
Шунга қарамай, футбол жамоатчилиги бу ҳақда билмайди, деб ёзилган твитда. Бундан ташқари «Anhor.uz» сайти мазкур масалага ўз эътиборини қаратиб, ЎФФни ўз низомига риоя қилмаётганликда айблаган. Шунингдек, ташкилот вице-президенти Сардор Раҳматуллаевнинг Халқаро пресс-клубда айтган шаффофлик ҳақидаги фикрларини эслатиб ўтган. Гарчи Раҳматуллаев ЎФФ барча ишни шаффоф амалга ошириши ҳақида айтиб ўтган бўлса-да, ташкилот расмий сайти ҳозирга қадар ҳисобот-сайлов конференциясининг аниқ санасига ойдинлик киритмаган.
ЎФФ низоми ва Ижроия қўмитаси қарорига кўра (27-модда, 2-банд), ҳисобот-сайлов конференциясига 6 ҳафта вақт қолганида ташкилот бу ҳақда расман маълумот бериши шарт. Қайд этиш керак, Эронга қарши ЖЧ—2018 саралашидан жой олган учрашувдан кейин, аниқроғи, 15 июнь куни ЎФФ матбуот хизмати бу ҳақда маълум қилган. Бироқ аниқ сана кўрсатилмаган. Бунда асосий масала Самвел Бабаяннинг камида 5-сантабрга қадар миллий терма жамоа бош мураббийи бўлиб қолишига қаратилган, ҳисобот-сайлов конференцияси масаласи бу хабарга илова қилинган.
Энди ЎФФ ўз низомидан келиб чиқиб, сайловгача 6 ҳафта қолганида аниқ санани айтган ҳисобланмайди. 12 сентябрь санаси эса ҳозирча норасмий манба томонидан айтилган бўлиб қолаверади. ФИФА ва ОФК бундан воқиф этилгани футбол жамоатчилигига маълум қилинмаган.
«Anhor.uz»нинг қайд этишича, ЎФФ президентлиги учун номзодлар сайловга 4 ҳафта қолганида ошкор этилиши лозим. Бироқ бу масалада ҳам ташкилот ҳозирча жим. Демак, футбол жамоатчилигида мавжуд вазиятни кенг муҳокама қилиш учун вақт ва имконият етарли бўлмаслиги мумкин. Шундан келиб чиқилса, хабарда ЎФФни шаффоф ташкилот дейиш мумкинми, деган фикр илгари сурилган.
Изоҳ (0)