Зидан — ўйиндан кейин
Мазкур соврин «Реал Мадрид» бош мураббийи Зинедин Зидан учун янада аҳамиятлироқ — у жамоа рулига келганидан кейинги бир ярим йил ичида еттинчи совринни қўлга киритди ва мазкур кўрсаткич бўйича, Висенте Дел Боскени ортда қолдиргани ҳолда, клуб тарихидаги энг муваффақиятли учинчи мутахассисга айланиб олди
Маълумот учун: Бунгача Зидан «Реал» устози сифатида икки марта Чемпионлар Лигаси ва Европа Суперкубогида, бир мартадан Испания чемпионати ва Клублар ўртасидаги жаҳон чемпионатида ғолиб чиққан эди.
Биринчи тайм жуда томошабоп бўлди. Биз жуда фаол ўйин кўрсатдик ва навбатдаги совринни қўлга киритганимиздан мамнунмиз. Олдинда бизни узоқ давом этадиган мавсум кутиб турибди. Биз, худди ўтган йилдаги каби, чемпионатда ғолиб чиқишимиз керак. Соврин учун кураш сўнгги лаҳзага қадар давом этади. Мавсумни совринлар билан бошлаганимиздан хурсандман. Бу футболчилар билан бирга ғолиб чиқиш ёқимли.Суперкубокдаги ғалаба билан биз бир даврни якунладик ва энди янгиси бошланади — олдинда яна тўртта мусобақа кутиб турибди. Осон бўлмайди, бироқ биз курашга тайёрмиз.
Зинедин Зидан, «Реал Мадрид» бош мураббийи
Асенсионинг суперголи ҳақида
Суперкубок жавоб учрашуви тақдири, қайсидир маънода, 4-дақиқадаёқ ҳал бўлиб улгурган эди. Каталониядаги баҳсда учинчи голга муаллифлик қилган Асенсио (қайд этиш жоиз, ўша ҳам исталган «Голлар ўнлиги» безагига айлана оларди), жавоб ўйинида супергол урди. Футболчилик фаолияти давомида ўзи ҳам бир-биридан чиройли голларга муаллифлик қилган Зидан Асенсионики каби голларни яхши кўришини тан олди.
Нафақат Асенсио, балки бутун жамоа аъло ўйин кўрсатди — биз барчамиз бундан кейин ҳам ғалаба қозониш истагидамиз. Ҳамма қатори менга ҳам бундай голлар жуда ёқади.Зинедин Зидан, «Реал Мадрид» бош мураббийи
Валверде — ўйиндан кейин
«Атлетик Билбао»дан жанговар жамоа тузган Эрнесто Валверденинг «Барселона»даги дебюти кўп ҳам омадли чиқмади — Неймарнинг шов-шувли тарзда кетиши, Суперкубокда ашаддий рақибдан қабул қилинган аламли мағлубиятлар. Лекин каталонияликлар устози келажакка умид билан боқмоқда.
Мағлуб этиб бўлмайдиганлар йўқ. Агар гап спорт ҳақида бораётган бўлса, шуни ишонч билан айтиш мумкинки, ҳар қандай жамоа бир куни келиб мағлубиятга учрайди.Мағлубиятга учрасанг ва рақиб сендан устун келганини англасанг, бу ҳолда учрашувнинг фақат техник жиҳатларини баҳоламоқ даркор. Руҳий жиҳатдан биз фақат ғалаба учун тайёргарлик кўргандик, бироқ ўхшамади. Энди биз руҳий жиҳатдан тикланиб олишимиз керак, бизда яхши жамоа бор ва бунинг уддасидан чиқа оламиз.
Эрнесто Валверде, «Барселона» бош мураббийи
Суареснинг жароҳати ҳақида
Учрашувнинг 85-дақиқасида Луис Суарес тиззасидан жароҳат олди. Каталонияликлар бунгача учта футболчини алмаштириб бўлгани боис, уругвайлик ҳужумчи учрашув охиригача майдонда қолди, ўйиндан сўнг эса майдонни чўлоқланганча тарк этди.
Суарес тиззасидан шикастланди. Вазиятга пайшанба куни аниқлик киритилади.Эрнесто Валверде, «Барселона» бош мураббийи
Изоҳ (0)