Бир қатор интернет нашрларида 15 август куни Олий суд раиси Козимжон Комилов томонидан ўтказилган фуқароларнинг шахсий қабули давомида «дарғазаб оломон» томонидан суд биноси «штурм қилинганлиги» ҳақида хабарлар чоп этилди. Олий суд матбуот хизмати ушбу маълумотларни инкор этди.
Матбуот хизматига кўра, шу куни 9:30дан 21:00 гача Козимжон Комилов томонидан фуқаролик, жиноий, маъмурий ва иқтисодий ишлар юзасидан 100 дан ортиқ киши қабул қилинди. Шунингдек, 27 кишидан ариза ва шикоятлар олинди, 72 киши турли масалалар бўйича оғзаки мурожаат қилди.
Қабул чоғи Олий суд биноси дарвозаси олдида кутиб турган бир неча фуқаро ички ишлар ва суд ходимларининг эътиборини чалғитиб, ўзбошимчалик билан навбатсиз қабулга кириш мақсадида бинога кирди. Улар бино фойесида қабул тартиби ҳақида тушунтириш олди, бир қисмлари раис, қолганлари раис ўринбосари ва судьялар томонидан қабул қилинди.
Матбуот хизмати раис ва унинг ўринбосарлари томонидан фуқаролар қабули ҳар куни амалга оширилишини эслатиб ўтди.
Изоҳ (0)