Охирги 50 йил давомида дунё Шимолий Кореянинг ақлдан ташқари ва беҳуда таҳдидларига кўникиб қолди, бироқ Ким Чен Ин даврига келиб бу таҳдидлар реалроқ жаранглай бошлади. Шимолий Корея янги етакчиси бошчилигида аллақачон бир нечта ядро синови ўтказди. Бугун Ким Чен Инга бутун дунё диққат-эътибори қаратилган бўлса-да, у ҳақдаги маълумотлар кўп эмас. Энг кўп таҳдид қилувчи оламшумул диктатор ҳақида нималарни биламиз, деб ёзади InsiderPro нашри.
Ким Чен Ин 1982, 1983 ёки 1984 йилнинг 8 январида дунёга келган.
Унинг ота-онаси Шимолий Кореянинг бўлажак диктатори Ким Чен Ир ва Ко Ён Хи эди. Катта акаси Ким Чен Чхоль бўлса, бир муддатдан кейин кичик синглиси Ким Ё Чжон туғилди.
Шимолий Корея етакчисининг расмий туғилган йили — 1982 йил, бироқ бу сана ўзгартирилган деб ҳисобланади. Бунга турли сабаблар келтирилади — ўша йили Ким Ир Сеннинг 70, Ким Чен Ирнинг эса 40 ёшга тўлганлиги ҳам ана шундай сабаблардан бири.
Шунга қарамасдан, яқинда АҚШ Ғазначилик департаменти Ким Чен Инга нисбатан эълон қилган санкцияларда у туғилган сана 1984 йилнинг 8 январи деб кўрсатилган.
Ким Чен Иннинг болалиги уйда ўтган — суратда у онаси билан.
Ўша пайтларда Шимолий Кореяни Ким Ир Сен бошқарган, Ким Чен Ир унинг меросхўри бўлганлигига қарамасдан, ҳокимиятнинг Ким Чен Инга ўтиш эҳтимоли юқори эмас эди.
Кейинроқ у мактаб-интернатда ўқиш учун Швейцарияга йўл олди.
У Швейцарияда Шимолий Корея элчихонаси ходимининг ўғли, Ин Пак сифатида таништирилган.
Собиқ синфдошлари Ким Чен Инни уйдан чиқмайдиган ювош, бироқ ҳазил-мутойибани тушунадиган йигит сифатида тасвирлайди.
Унинг бир синфдоши шундай ҳикоя қилади: «У ҳазилни тушунарди, ҳамма билан, ҳатто Шимолий Кореяга душман мамлакатлардан келганлар билан ҳам келишарди. Мактабда сиёсий муҳокамалар тақиқланган эди — фақат футбол ҳақида баҳслашиш мумкин эди».
Ким Чен Ин баскетболни ёқтирар ва Майкл Жорданни ҳаддан ортиқ яхши кўрар эди.
У мактабда ўқиб юрганда хонаси деворларига Жорданнинг плакатлари ёпиштирилган экан. Ким Чен Ин тўладан келган ва баланд бўйли бўлмаса ҳам (170 сантиметрдан пастроқ) баскетболни яхши ўйнаган.
«У жуда берилиб кетадиган ўйинчи эди, баъзан портлаб кетар эди. Ғалаба учун қўлидан келган ҳамма нарсани қиларди», — дея ҳикоя қилади собиқ синфдоши Никола Ковачевич.
Шунингдек, унинг Nike кроссовкаларидан иборат ғаройиб коллекцияси бўлганлигини ҳикоя қилишади.
Швейцария интернатидан сўнг у ҳарбий таълим олиш учун уйига қайтади.
Шимолий Кореяга қайтгандан сўнг Ким Чен Ин ва унинг акаси Ким Ир Сен Ҳарбий университетида ўқий бошлаган — 2007 йилда улар отасининг назорат сафарларида иштирок эта бошлаган.
Тажрибасининг етишмаслигига қарамасдан, Ким Чен Ин ҳарбий ва сиёсий хизмат пиллапояларида тез илгарилаб кетди. Отаси вафот этганда у тўрт юлдузли генерал, Ишчи партия Марказий ҳарбий комиссияси раис ўринбосари ва Марказий қўмита аъзоси эди.
Шимолий кореяликларнинг кўпчилиги Ким Чен Инда Ким Ир Сеннинг тимсолини кўради.
Ким Чен Ин ташқи кўриниши, ўзини тутиши ва соч турмаги билан ҳам бобосига жуда ўхшайди. Ҳатто у ўхшашликни кучайтириш учун пластик операция қилдиргани ҳақидаги миш-мишлар ҳам мавжуд. Бироқ Шимолий Корея бу миш-мишларни рад этади ва уларни сариқ матбуотнинг жирканч уйдирмалари деб атайди.
Отасининг ўлимидан сўнг Ким Чен Ин Шимолий Кореянинг «Буюк йўлбошчиси» деб эълон қилинди.
2011 йилнинг 17 декабрида Ким Чен Ир юрак хуружидан вафот этганда ёш Ким Чен Ин дунё бўйича тўртинчи катталикдаги армия, ядро қуроли ва Шимолий Корея устидан мутлоқ назоратни қўлга киритди.
Шу тариқа, 30 ёш атрофида ҳокимият тепасига келган Ким Чен Ин сайёра бўйича энг ёш давлат раҳбарига айланди.
Дастлаб кўпчилик мамлакатни аслида Ким Чен Иннинг 66 ёшли амакиси ва аммаси бошқараётганини тахмин қилди.
Улар унинг ишончли маслаҳатчилари эди ва Ким Чен Ир ҳам уларга бир неча марта армияни назорат қилиш ва тажриба тўплагунга қадар ўғлига ёрдам беришни буюрганлиги маълум қилинади.
Бироқ 2013 йилнинг декабрь ойи охирида Ким Чен Ин давлат тўнтаришга уринишда айблаб амакиси ва унинг оиласини қатл эттирди.
2013 йилнинг 12 декабрида Ким Чен Ин амакиси Чан Сон Тхекни қатл эттирди.
Унга нисбатан ҳарбий тўнтариш йўли билан ҳокимиятни эгаллашга уриниш айби эълон қилинди.
Ким Чен Иннинг рафиқаси — Шимолий Корея енгил атлетика жамоаси қўллаб-қувватлаш гуруҳининг собиқ иштирокчиси.
Шимолий Корея етакчилари одатда шахсий ҳаётини жуда сир тутади, бироқ Ким Чен Ин рафиқаси билан тез-тез омма олдида пайдо бўлади ва у билан суратга тушади.
Июль ойида Шимолий Корея ОАВлари Ким Чен Ин собиқ қўшиқчи ва чирлидер Ли Соль Чжуга уйланганлиги ҳақида маълум қилди, бироқ уларнинг тўй санаси маълум эмас.
Жанубий Корея разведкаси жуфтлик эҳтимол 2009 йилда турмуш қурган ва бу пайтга келиб бир нафар фарзанди бўлган деб ҳисоблайди. Шунингдек, 2012 йилда Ли Соль Чжу яна бир фарзанд, қизли бўлганлиги ҳақида миш-мишлар юради.
2015 йилда уларнинг яна бир фарзанди дунёга келганлиги ҳақида маълумотлар бор.
Шимолий Кореяга Американинг «Чикаго Буллз» баскетбол жамоасининг собиқ юлдузи Деннис Родманнинг келиши Ким учун болалик орзусининг рўёбга чиқиши эди.
Охирги вақтларда Ким Чен Ин ҳаётида ҳаммаси равон эмас.
2013 йилда унинг жонига қасд қилишган. Жанубий Корея разведкаси ёш етакчига ўзининг одамлари ҳужум қилган деб ҳисоблайди — у қайсидир тўрт юлдузли генерални мансабидан тушурган, бу эса ҳокимият учун курашни кескинлаштирган.
Эҳтимол барчаси назоратда эканлигини намойиш қилиш учун Ким ўта жанговар қиёфага кирди, Жанубий Корея билан барча алоқаларни узди ва қўшни мамлакат ҳамда АҚШга ядро уруши билан таҳдид қила бошлади.
Ким Чен Ин бутун бошқаруви давомида мамлакатни Ғарб ва Жанубий Корея билан уруш ҳолатида тутиб турди — эҳтимол ўз нуфузини мустаҳкамлаш учун шундай йўл тутди.
Санкциявий таҳдидларга қарамасдан, Шимолий Корея баллистик ракеталар ва ядро бобмаларини синовдан ўтказишни давом эттирди, 2012 йилда эса биринчи космик сунъий йўлдошни учирди.
Ядровий синовлар ва халқаро босим 2016 йилгача давом этди.
2016 йилнинг 5 январида Шимолий Корея тўртинчи ядро синовини ўтказди — Пхеньян бу жуда кичик водород бомбаси бўлганлигини таъкидлайди.
Бунга жавобан кўплаб дунёвий етакчилар, жумладан, асосий иттифоқчи Хитой ҳам Шимолий Кореяга қарши чиқди.
Ким Чен Ин ядро қуролини мукаммаллаштиришга қатъий қарор қилган кўринади, экспертларнинг баҳолашича, Шимолий Корея 2020 йилга келиб АҚШга етишга қодир жанговар каллакларни ишлаб чиқади.
Малайзия аэропортида Ким Чен Намнинг ўлдирилиши Шимолий Кореянинг ушбу жиноятдаги ролини халқаро миқёсда суриштиришга олиб келди.
2017 йилнинг 13 февралида Ким Чен Иннинг ўгай акаси Ким Чен Нам Куала-Лумпур аэропортида заҳарлаб ўлдирилди.
Трамп маъмуриятининг келиши билан Шимолий Корея билан можаро янги авжига чиқди.
АҚШ президенти Дональд Трамп вазифасини бажаришга киришиши билан Шимолий Кореяни мамлакат учун энг катта таҳдид деб атади.
Обама даврида Америка ҳукумати қарама-қаршиликни «стратегик тоқат қилиш» дастури доирасида ҳал этишга уринса, Трамп маъмурияти Шимолий Кореянинг зудлик билан қуролсизланишини талаб қилиб, огоҳлантирувчи ҳарбий зарба эҳтимоли билан шама қила бошлади.
Изоҳ (0)