Россия бош вазири Дмитрий Медведев МДҲ давлатлари солиқ идоралари ўртасида электрон кўринишдаги маълумотлар алмашиш ҳақидаги протокол лойиҳасини маъқуллади. Бу ҳақда «ТАСС» хабар бермоқда.
«Протоколда мазкур мамлакатлар юридик ва жисмоний шахслари даромадларининг айрим турлари, шунингдек, МДҲ давлатлари ҳудудида рўйхатдан ўтказилган мол-мулкнинг баъзи турлари бўйича маълумот алмашиш кўзда тутилган», — дейилади фармойишга келтирилган изоҳда.
Солиқ идоралари юридик шахсларга нисбатан тўлов манбаси бошқа давлатда бўлган ташкилотнинг даромадлари, шунингдек, бошқа давлатдаги доимий ваколатхона фаолияти орқали олинадиган даромадлар тўғрисида маълумотлар билан алмашади.
Жисмоний шахсларга нисбатан эса ёлланма ва шартнома орқали иш бўйича олинган даромадлар, дивидендлар, устав капитали ва кўчмас мулкдаги улушлардан олинадиган ҳамда бошқа даромадлар тўғрисидаги маълумотлар ўзаро баҳам кўрилади.
Изоҳ (0)