АҚШ аҳолиси дорилар ва шифокор қабулига бориш харажатларини камайтириш учун ҳайвонларга мўлжалланган препаратлар, шу жумладан антибиотикларни сотиб олмоқда. Бу ҳақда BuzzFeed’га таяниб, «Корреспондент.net» хабар бермоқда.
АҚШ шифокорлари ва соғлиқни сақлаш мутахассислари бу тенденцияни хавфли деб атаган ҳолда ундан хавотирга тушмоқда. Таъкидланишича, соғлиқни сақлаш соҳасидаги Obamacare ислоҳотларининг бекор қилиниши ҳимояланмаган аҳоли қатламининг соғлиқни сақлаш тизимидан фойдаланиш имкониятларини янада пасайтириб юборади.
Мисол сифатида 27 ёшли Крис исмли ногирон йигит келтирилган. У аквариум балиқлари учун мўлжалланган антибиотикларни сотиб олмоқда, чунки бу воситалар унга шифокор томонидан ёзиб берилганларидан кўра 10 баравар арзон туради. Яъни балиқлар учун мўлжалланган дори 15 доллар турса, шифокор тавсия этгани 150 доллар, Криснинг ойлик даромади эса 700 долларни ташкил қилади.
Ҳайвонлар учун мўлжалланган антибиотиклар ортиқча дозалилик эҳтимоли ва антибактериал препаратларга қаршилигининг тарқалиши сабабли хавфли ҳисобланади.
Одамлар учун мўлжалланган антибиотикларни дорихоналарда шифокор рецептисиз сотиб олишнинг деярли имкони йўқ. Тиббий суғуртасиз шифокор қабулига шошилинч вазиятда бориш эса бир неча минг долларни ташкил қилиши мумкин.
Изоҳ (0)