Аргентина ҳукумати Венесуэла президенти Николас Мадурони республиканинг олий давлат унвони Озод қилувчи Сан Мартин орденидан маҳрум қилиш ҳақида қарор қабул қилди. Тегишли фармон 11 август, жума куни Аргентина Республикасининг расмий буллетинида эълон қилинди, деб ёзмоқда «ТАСС».
Ҳужжатга кўра, республика расмийлари Венесуэла президенти Николас Мадуро Моросни орден шарафига мос келмайдиган хатти-ҳаракатлари учун Озод қилувчи Сан Мартин орденидан фойдаланиш ҳуқуқидан маҳрум қилди.
Хусусан, Аргентина ҳукумати Мадурони намойишчиларга босим ўтказиш ва мухолифатчиларни судга жалб қилиш учун ҳарбий ресурслардан ва суддан асоссиз фойдаланишда айблади.
Мазкур орден 1943 йилда Аргентина миллий қаҳрамони генерал Хосе де Сан Мартин шарафига таъсис этилган. Фармонда қайд этилганидек, унвон «ўз мажбуриятларини бажаришда республиканинг олий миннатдорчилик даражасида сазовор бўлган фақат хорижий давлат арбобларига берилади».
Мадуро Аргентинанинг собиқ президенти Кристина Фернандес де Киршнер қарорига асосан 2013 йилда орден билан тақдирланган эди.
Изоҳ (0)