Curiosity марсоходи 2012 йил 6 августда Марсга етиб борган бўлиб, NASA томонидан сайёрага учирилган ўн тўққизинчи космик қурилмадир. Унинг асосий вазифаси Марсда ҳаёт учун муносиб шароитлар бор ёки йўқлигини аниқлаш, сайёра геологияси ва иқлими ҳақида маълумотлар тўплаш, инсоннинг Марсга қўниши учун майдончалар ҳозирлашдан иборат, деб ёзади «Газета.ru».
Уч метрли марсоходнинг оғирлиги 899 килограмм ва у соатига 144 метр тезликда ҳаракатланади. Унга камералар, масофадан туриб тадқиқот ўтказиш воситалари, спектрометр, тупроқдан намуна олиш учун ковш ҳамда метеорологик ускуналар жамланмаси ўрнатилган.
Марс юзасидаги атроф-муҳитни ўрганиши учун у жами бўлиб 10 та илмий қурилма ва суратга олиш ишларини бажариши учун 17 та рангли ҳамда оқ-қора камералар билан жиҳозланган.
Curiosity Марсга қўнганидан бери 16 километр масофа босди ва Sharp тоғи қиялиги бўйлаб 165 метр баландликка кўтарилди.
У қадимий сув изларини, Марс тупроғининг таркибини аниқлади ва тарихда биринчи бор Марс юзасини бурғалаб, қаттиқ тупроқ намуналарини қўлга киритди. Марсоходнинг фаолияти Ердаги 400 зиёд мутахассис томонидан таъминлаб турилади.
Миссия икки йилга мўлжалланганига қарамай, марсоход Қизил сайёрадаги ишини ҳамон давом эттирмоқда. У янги намуналарни аниқлаб, Ерга Марс ландшафтининг янгидан-янги суратларини йўлламоқда.
Изоҳ (0)