Венесуэлада Миллий гвардия бўлинмалари мамлакат бош прокуратураси биносини қуршаб олди. Ҳодиса жойидан олинган фотосуратларни мамлакат бош прокурори Луиза Ортега Twitter’даги саҳифасида эълон қилди.
Nacionал нашрининг ёзишича, Венесуэла бош прокуратурасига маҳаллий вақт билан тонг соат 6:00 да (Тошкент вақти билан 15:00 да) формадаги шахслар келган. Улар бинони қуршаб олиб, ходимларнинг ичкарига киришига йўл қўймаган.
Ортега ҳарбийларнинг бу ҳаракатларини қоралаган. «Бош прокуратуранинг қамал қилинишини қоралайман. Мен ўзбилармончилик ҳаракатлари ҳақидаги маълумотларни нафақат мамлакат аҳлига, балки жаҳон жамоатчилигига ҳам етказаман», — деб ёзди у.
Ҳарбийларнинг бу ҳаракатини Америка давлатлари ташкилоти (АДТ) бош котиби Луис Алмагро ҳам танқид қилди. У бу ҳолатни «ҳуқуқнинг қўпол равишда бузилиши» деб атади. «Биз Венесуэла бош прокуратурасига нисбатан куч ишлатилишини қоралаймиз», — деб ёзди Алмагро Twitter’даги саҳифасида.
Венесуэла бош прокуратураси 4 август куни сайлови мамлакат ҳукумати томонидан ўтказилган Венесуэла Конституциявий ассамблеяси фаолиятини тўхтатишни талаб қилган эди. Идора маълумотларига кўра, сайлов давомида бир қатор қонунбузарликларга йўл қўйилган.
Венесуэла Конституциявий ассамблеяси мамлакат президенти Николас Мадурога мухолифат кайфиятидаги парламент ўрнини эгаллаши лозим. Ассамблея мамлакат Конституциясини ўзгартириш ҳуқуқига эга. Янги органга сайловлар 30 июль куни бўлиб ўтган, 4 август куни эса у ўз фаолиятини бошлаган.
Конституциявий ассамблеянинг ташкил этилиши мухолифат томонидан оммавий норозилик намойишлари билан кутиб олинди, намойишларни тарқатиш учун ҳукумат хавфсизлик кучларидан фойдаланди. 30 июлдаги намойишлар давомида портлаш юз бериб, оқибатда бир неча полициячи жароҳатланди.
Изоҳ (0)