Тошкент шаҳар ҳокимлиги шаҳардаги 9 қаватли собиқ ётоқхоналардан бирида оиласи билан бирга истиқомат қилаётган фуқаролардан бирининг «Озодлик» радиосида эълон қилинган мурожаатини ўрганиб чиқди. Бу ҳақда ҳокимлик сайтида ахборот берилган.
Ҳокимликнинг маълум қилишича, муаммолари «Озодлик»да кўрсатилган ётоқхона Яшнобод тумани, Авиасозлар 2-даҳаси, 37-уйда — собиқ Авиасозлар бирлашмасининг 22-сонли тўққиз қаватли ётоқхонасининг 103-хонаси бўлиб чиқди.
Хонадон эгаси Муқаддас Ҳайдарова оиласи билан 2015 йилнинг 2 февралидан буён жойда истиқомат қилиб келади. «Фуқаро мурожаатида билдирилган салбий ҳолатлар, жумладан М.Ҳайдарова эгаллаб турган хонага туташ бўлган шчитхона бутун бинони электр қуввати билан таъминловчи шчит ҳисобланади. Унинг алоҳида ёпиқ кичик хонада бўлиши бино лойиҳасида белгиланган», — дейилади ҳокимлик ахборотида.
Масала жойига чиқиб ўрганилганда, шчитхона эшиги йўқлиги ҳамда қаровсиз аҳволда эканлиги ўз тасдиғини топди. Мутахассислар томонидан ушбу салбий ҳолат тезда бартараф этилди — шчитхонанинг ташқи кўриниши тўлиқ тартибга келтирилиб, унинг кириш қисмига қулфли эшик ўрнатилди.
«Лекин фуқаронинг шаҳар ҳокими қарори билан уйнинг ярми олиб қўйилмоқчи, деган даъволари мантиққа зид. Чунки бу каби қарор умуман қабул қилинмаган, қабул қилиниши ҳам мумкин эмас», — деб ёзади ҳокимлик ахборот хизмати.
Ҳокимликнинг тушунтиришича, Вазирлар Маҳкамасининг 22 июндаги «Ўзбекистон Республикасида давлат уй-жой фондини хусусийлаштириш тўғрисидаги Низомга ўзгартириш киритиш ҳақида»ги қарорига асосан, фуқароларга 2018 йил 1 июлигача уй-жойларни хусусийлаштириш имконияти берилган. Бунга ётоқхоналарда доимий яшаб келаётган фуқаролар тоифаси ҳам киради.
Изоҳ (0)