Албания бош вазирига кроссовка сабаб АҚШ вице-президенти билан суратга тушишга рухсат берилмади

Албания бош вазири Эди Рама ўзининг оқ кроссовкалари сабаб АҚШ вице-президенти Майкл Пенс билан суратга туша олмади. Бу ҳақда «ТАСС» хабар бермоқда.

Эълон қилинган расмий суратда Пенс Черногория, Македония, Босния ва Герцеговина, Словения, Хорватия, Сербия, Косово бош вазирлари билан бирга турганини кўриш мумкин.

Суратда Албания бош вазири йўқ. Адриактика хартияси мамлакатлари бош вазирлари учрашувидан олинган бошқа суратларда Албания бош вазири тадбирга оқ кроссовкада келганини кўриш мумкин.

Албаниянинг собиқ президенти Сали Беришанинг сўзларига кўра, Рама классик костюм-шим кийиб келганига қарамай, оёғида оқ кроссовка бўлгани сабабли ҳам бошқа мамлакатларнинг ҳукумат раҳбарлари билан учрашув якунлари бўйича суратга тушишга қўйилмаган.

Кузатувчиларнинг қайд этишича, Рама ташқи кўриниши билан жамоатчилик эътиборини биринчи марта ўзига қаратаётгани йўқ. Триестдаги саммит вақтида ҳам унинг пойабзали гап-сўз бўлган эди, унинг Европа ташқи ишлар комиссари Федерика Могерини билан бирга тушган сурати эса Болқон интернетида мемга айланган эди.