Alibaba компанияси Хитойда автомобиль савдоси билан шуғулланувчи кўп қаватли савдо автоматини қуради. Бу ҳақда Азила нашрига таяниб, Insider Pro хабар берди.
Мижоз смартфонидаги махсус дастур ёрдамида моделни танлаши ва буюртмани рўйхатдан ўтказиши мумкин. Пул тўлангач, автомобиль кўп қаватли савдо аппаратидан пастга туширилади.
Тўлов тизими Alibaba фойдаланувчисининг Sesame Credit тизимидаги рейтингига боғлиқ бўлиб, у ерда харидорлар ўзларининг фаоллигига қараб балл билан тақдирланади. 750 баллдан кўпроқ тўплаган фойдаланувчи биринчи 10 фоизлик тўловни тўлаши ва қолган маблағни ҳар ойда тўлаб бориши мумкин бўлади.
Аппаратнинг ишга тушишига жавобгар, Tmall компаниясининг (Alibaba Group таркибига киради) бош менежери Юй Вейнинг айтишича: «Машинани сотиб олиш бир банка газланган ичимлик сувини сотиб олишдек осон бўлади».
Юй Вей автомобиль рақамлари билан боғлиқ масала қандай ҳал этилишига аниқлик киритмади. Қонунга кўра, Пекинда йилига 240 мингга яқин автомобиль рақамлари чиқади, бу ойига 20 минг демакдир. Уларни танлаб олиш лотерея орқали амалга оширилади. Бу автомобиль учун янги рақам олиш бир неча ойга, ҳатто йилга чўзилиши мумкин дегани.
Бу каби автомобиль сотувчи автомат биринчи бор 2015 йилда Caravanа онлайн сервиси томонидан АҚШда очилган. Яна бир шу турдаги аппарат жорий йилнинг май ойида Сингапурда ҳам пайдо бўлган эди.
Изоҳ (0)