«Самолатлик» поезди 24 июль кунидан Ўзбекистоннинг Навоий ва Бухоро вилоятларида бир ҳафта давомида энг олис ҳудудлар аҳолисини чуқурлаштирилган тиббий кўриклардан ўтказди.
Соғлиқни сақлаш вазирлиги Ахборот хизмати хабарига кўра, поезд 1 августдан Самарқанд, Қашқадарё ва Сурхондарё вилоятларининг чекка ҳудудларида истиқомат қилувчи аҳолини кўриклардан ўтказмоқда.
Ўтказиладиган кўрикларнинг сифат ва самарадорлигини таъминлаш, натижадорлигини ошириш мақсадида ихтисослаштирилган марказлар директорлари бошчилигида ўнга яқин тор соҳа мутахассисларидан иборат гуруҳлар вилоятларнинг энг чекка ҳудудларида ўз ишини бошлади.
Эътиборли томони улар таркиби республика ихтисослаштирилган тиббиёт марказлари, илмий-текшириш институтлари, республика клиник шифохоналарининг етакчи олимлари, тиббиёт фанлари докторлари ва юқори малакали шифокорларидан ташкил топган.
«Саломатлик» поездлари фаолиятининг асосий мақсади ихтисослаштирилган тиббий ёрдамни вилоят аҳолисига янада яқинлаштириш, энг чекка туманларда яшовчи фуқаролар ҳам юқори технологик тиббий ёрдамдан баҳраманд бўлиши учун шарт-шароитлар яратиш, маҳаллий шифокорлар учун маҳорат дарслари ўтказишдир.
Кўриклар давомида мутахассислар ҳар бир мурожаат қилувчига алоҳида эътибор қаратиб, тўшакда ётиб қолган қариялар ва беморлар ҳолидан хонадонларга бориб хабар олишмоқда. Аниқланган беморлар эса амбулатор шароитда вилоят ва республика тасарруфидаги даволаш-профилактика муассасаларида ҳамда республика ихтисослаштирилган марказларида ўрнатилган тартибда соғломлаштирилади.
Биз тиббий кўрикларимизни Сурхондарё вилоятининг чекка ҳудудларида ўтказмоқдамиз. Ҳақиқатан ҳам, малакали ихтисослаштирилган тиббий хизмат узоқ туманларда истиқомат қилувчи аҳолига ҳар доим ҳам ўз вақтида ва сифатли кўрсатилмаяпти. Буни биз тиббий кўриклар чоғида халқ билан мулоқот қилиб биляпмиз. Айрим беморлар тиббий таҳлилдан ўтиш учун вилоят марказига ёки пойтахтга боришини айтмоқда.Республика тиббий марказларидан борган малакали мутахассислар фақат тиббий кўрикларнигина ўтказиб қолмай, маҳаллий шифокорларга мураккаб жарроҳлик амалиётлари ва даволаш усуллари бўйича маҳорат дарслари ҳам ўтишмоқда. Бу эса, туманда малакали ихтисослаштирилган тиббий хизматнинг давомийлигини таъминлайди.Ушбу тадбир туман аҳолисига ўз ҳудудидан чиқмаган ҳолда республика даражасидаги сифатли ихтисослаштирилган тиббий ёрдам олиш имкониятини яратиб бермоқда. Аҳамиятли жиҳати, агар бир беморда бир неча турдаги касаллик аниқланса, тор соҳа мутахассислари консилиуми асосида унга муолажа тайинланмоқда. Бу бир вақтнинг ўзида бир неча ихтисосликдаги шифокор кўригидан ўтиш имкониятидир.
Ғайрат Қориев, Республика ихтисослаштирилган нейрохирургия илмий-амалий маркази директори, «Саломатлик» поездининг Сурхондарё вилояти бўйича гуруҳ раҳбари
Ўтказилаётган сайёр консултациялар доирасида аҳоли ўртасида тиббий маданиятни юксалтириш, соғлом турмуш тарзини қарор топтириш, юқумли касалликларнинг олдини олиш бўйича тушунтириш ишлари ва мулоқотлар ҳам олиб борилмоқда.
Изоҳ (0)