КХДР жанговар каллак орқали атмосферанинг қалин қатламларини ёриб ўтиш технологиясини муваффақиятли тарзда ўзлаштирди, бу қитъалараро баллистик ракета яратишга йўл очиб берадиган жиҳат ҳисобланади. Бу ҳақда Корея Республикаси парламенти мудофаа қўмитаси раҳбари Ким Ён У KBS радиостанциясига берган интервьюда айтиб ўтди, деб ёзади «ТАСС».
Унинг сўзларига кўра, Жанубий Корея ҳарбийлари 28 июль куни япониялик гувоҳлар томонидан олинган, Шимолий Корея жанговар каллаги атмосферанинг зич қатламларига кириши акс этган видеоёзувни пухталик билан ўрганган.
«Видеода қулаётган объектдан чиқаётган нурланиш жуда текис эканини кўриш мумкин», — деди Ким Ён У. Унинг фикрича, бу ракетанинг жанговар қисми ўта юқори ҳароратлар ва босимларга чидам берган ҳолда, ҳавода парчаланиб ва ёниб кетмасдан, нишонга бориб урилганидан дарак беради.
Мудофаа қўмитаси раҳбари, шунингдек, Пхеньян ракетанинг аниқлигини сезиларли равишда оширишга эришганини айтди. Жанубий кореялик ҳарбийлар маълумотларига кўра, жанговар каллак Хоккайдо оролидан 150 км масофага қулаган.
Изоҳ (0)