Ўзбекистон мега-заводлари: Аlutех заводида алюмин профиллар қандай ишлаб чиқарилади

Аlutех Ўзбекистон—Буюк Британия қўшма корхонаси 1999 йил ташкил топган. Корхона 2003 йилдан МДҲ давлатлари ичида биринчи бўлиб алюмин профиллар ва фурнитура ишлаб чиқаришни бошлаган. Алюмин профиллар экологик тоза, узоқ вақт хизмат қилади, оловбардош, қуёш нури остида ўз шаклини ва рангини ўзгартирмайди.

Биз заводни кўришга бориб, ишлаб чиқариш қандай ташкил этилганини кўрдик. Корхона Тошкент шаҳрининг Сергели туманида жойлашган.

Ишлаб чиқариш беш босқичдан иборат: металл қуйиш, экструзия, бўяш, анодлаш ёки декор, қадоқлаш ва лаборатория. Аlutех ишлаб чиқариш жараёнини тўлиқ ўзи амалга оширади.

Ишни бошлаш учун бизга алюмин қуймаси керак бўлади, Алутех дунёдаги энг йирик алюмин қазиб олувчиларидан бири бўлган Русал корхонаси билан ҳамкорлик қилади. Хом ашё металл қуйиш участкасига келиб тушади. Натижада 6 метр узунликдаги, диаметри 100—300 миллиметр алюмин қотишмалари чиқарилади. Заводда 3 эритиш печкалари ишлатилади.

Тайёр бўлган қотишма экструзия бўлимига ўтади. Корхона 500 дан ортиқ профил ва мижозлар чизмаларига асосан махсус профил турларини чиқариши мумкин экан. Уларни ишлаб чиқариш учун 7 пресс линиялари ташкил қилинган.

Кейинги босқичда маҳсулотлар бўяшга юборилади. Корхонада 4 автоматик бўяш линиялари мавжуд. Бўёқ сифатида полиэфир асосидаги сифатли чет эл эмали ишлатилади. Бундай эмал узоқ вақт хизмат қилади, экологик ва зарарсиз ҳисобланади. Мижозлар хоҳлаган рангларни кўп турдаги рангларни РАЛ каталоги бўйича танлашлиги мумкин.

Корхонада профилларни анодлаш имконияти мавжуд. Анодлаш — бу ҳимоя қатлами бўлиб, профил юзасида алюмин гидрат қопламини ҳосил қилади. Бу қоплама ромларни чанг ва қуёш нурларидан ҳимоя қилади.

Харидор талабига кўра алюмин профиллар декор қилиниши мумкин. Декор — бу дарахт ва тош расмларини чизиш технологиясидир. Расм вакуум шароитида туширилади. Натижада, чидамли ва чиройли юза ҳосил бўлади.

Тайёр маҳсулот ҳимоя плёнкаси билан қадоқланади.

Барча маҳсулотлар доимий экспресс-назоратдан ўтиб туради. Foundry Master лабораторияси ва компьютер технологияси ёрдамида, спектрографик усул билан барча материаллар кимёвий ташкил этувчилари синовдан ўтади.

Аlutех профилларидан дераза ромлари, эшик, фасад, мебел, ролставни, тутқичлар ва мижозлар чизмаларига асосан махсус профиллар ясалади.