Юнусободда «пойгачи» Spark қўшнисининг дарвозасига бориб урилиб, икки машинани пачоқ қилди (видео)

Тошкентнинг Юнусобод туманида 28 июль куни, ижтимоий тармоқлар фойдаланувчилар таърифи билан айтганда, ғалати йўл-транспорт ҳодисаси юз берди. Бу ҳақда Facebook’даги «Водители Ташкента (Drivers.uz)» гуруҳида видеохабар қолдирилган.

Йўл-транспорт ҳодисаси оқибатида Spark автомобили ҳайдовчиси катта тезликда қўшнисининг дарвозасига келиб урилган, оқибатда хонадондан ташқари яна икки автомобилга зарар етказган.

«Бугун тонгда Юнусободда даҳшатли ЙТҲ юз берди. Қўшним ўзининг Spark’ида дарвозамга учиб келди, сўнг айланиб кетиб, орқа томони билан акамнинг ‘Жигули’сига урилди. Уй ичида эса дадамнинг машинаси турганди. Бир зарб билан икки машинани расво қилди, уйга ҳам ачинасан киши. ЙТҲлар фақат йўлларда бўлади, деб ўйламанг», — дея жабрланувчининг ёзиб қолдирган сўзларидан иқтибос келтирмоқда «1news.uz» нашри.

Жабрланувчининг сўзларига кўра, унинг дарвозасига келиб урилган Spark маҳалла ичидаги кўчада бошқа бир машина билан пойга ўйнаган.

«Кўрган киши айтди — Spark пойга ўйнаган экан, катта тезликда бурилишни эплолмай, менинг дарвозамга келиб урилган», — дея қўшимча қилган жабрланувчи.