Ўзбекистон Президенти Шавкат Мирзиёев Қорақалпоғистон Республикасига ташрифи давомида Хўжайли туманидаги «Мурувват» аёллар интернатида ҳам бўлиб, муассаса фаолияти билан танишган, бу ердаги шарт-шароитларни янада яхшилаш бўйича кўрсатма ва тавсиялар берган эди. Бу ҳақда ЎзА хабар берди.
— Фойдаланаётган ҳозирги бино умумий тоифадаги ногиронларга мўлжалланган бўлиб, 1989 йилда қурилган ва бугунги кунда таъмирталаб бўлиб қолган эди, — дейди «Мурувват» аёллар интернати директори Лидия Ким. — Бу ерда асосан психоневрология хасталигига чалинган беморлар даволанади. Уларнинг аксарияти ногиронлар аравачасида ҳаракатланади. Бино йўлакларининг жуда торлиги ногиронлар аравачаси юриши учун ноқулайликлар туғдирар эди.
Давлат раҳбари кўрсатмалари асосида «Мурувват» уйи учун Нукус шаҳри ҳудудида алоҳида ер участкаси ажратилиб, февраль ойида қурилиш ишлари бошлаб юборилди. Икки қаватли замонавий иморат қурилишини олиб бораётган бош пудратчи «Инвестстрой Нукус» масъулияти чекланган жамияти томонидан ҳозирга қадар 14 миллиард сўмлик бунёдкорлик ишлари амалга оширилди. Объектни ноябрь ойида фойдаланишга топшириш мўлжалланмоқда.
Қурилиш ашёлари асосан маҳаллий корхоналар – Хўжайли, Халқобод, Нукус ғишт заводларидан, темир-бетон буюмлари «Евро бетон» ҳамда «Строй вектор» масъулияти чекланган жамиятлари, шунингдек, Ўзбекистон металлургия комбинатидан келтирилмоқда. Жадал суръатларда олиб борилаётган қурилиш ишларида 160 дан зиёд ишчи ва 20 га яқин техника иштирок этмоқда. 250 ўринга мўлжалланган замонавий бинода ётоқхона, даволаш бўлими, ошхона, спорт майдончаси бўлиб, даволанувчилар учун барча қулайликлар яратилмоқда.
Изоҳ (0)