Америка президенти Дональд Трамп Newsmax нашрига берган интервьюсида, у “тегишли ҳудудлар”га юборган иккита ядро сув ости кемаси энди Россияга яқинроқ жойда сузаётганини айтди.
1 август, жума куни Дональд Трамп Россия хавфсизлик кенгаши раиси ўринбосари Дмитрий Медведев (собиқ президент)нинг “ўта провокацион баёнотлари” муносабати билан АҚШнинг иккита ядровий сув ости кемасини “тегишли ҳудудлар”га жойлаштиришни буюрган эди.
“Россиянинг собиқ президенти, ҳозирда Россия Хавфсизлик кенгаши раиси ўринбосари лавозимида фаолият юритаётган Дмитрий Медведевнинг ниҳоятда провокацион баёнотларига асосланиб, мен иккита атом сувости кемасини тегишли ҳудудларга жойлаштиришни буюрдим. Бу аҳмоқона ва гижгижловчи баёнотлар қуруқ гап бўлмаслиги ҳам мумкин. Сўзлар катта аҳамиятга эга ва кўпинча кутилмаган оқибатларга олиб келади. Умид қиламанки, бу ҳолат шундайлардан бири эмас”, деб ёзди Трамп.
Эслатиб ўтамиз, Трампнинг Украинада урушни тўхтатиш бўйича Россияга ультиматумига жавобан Медведев АҚШга ядровий зарба берилиш эҳтимолига ишора қилган эди.
Трамп ва Медведевнинг ёзишмалари
28 июль куни Медведев Х ижтимоий тармоғида Россияга қарши санкциялар тарафдори бўлган америкалик сенатор Линдси Грем билан жанжаллашиб қолди. Гап шундаки, Оқ уй раҳбарининг Украинага оид келишувларга эришиш муддатини 50 кундан 10 кунга қисқартириш бўйича янги ультиматумини Медведев “таҳдид ва уруш сари қадам” деб баҳолаган. Шунингдек, у ўз постида Трамп ва Гремни “қариялар” деб масхара қилган.
Бунга жавобан Трамп 31 июль куни Truth Social тармоғида Россия ва унинг энг йирик нефть импортчиларидан бири ҳисобланган Ҳиндистоннинг иқтисодини “ўлик” деб атаган. Шу билан бирга, АҚШ президенти Медведевни “ҳали ҳам ўзини президент деб ҳисоблайдиган, омадсиз собиқ президент” эканини айтиб, оғзига эҳтиёт бўлишини маслаҳат берган.
Шундан сўнг Медведев Россия — бу Исроил ёки Эрон эмаслигини, унга ультиматумлар қўйиб бўлмаслигини ва ҳар қандай талаб уруш сари ташланган қадам эканини ёзди.
“Бу уруш Россия ва Украина ўртасида эмас, балки у (Трамп)нинг ўз мамлакати билан бўлади. Ухлаётган Жо йўлидан борманг”, деб огоҳлантирган Медведев АҚШнинг собиқ президенти Жо Байденга ишора қилган ҳолда.
Изоҳ (0)