Тошкент шаҳри ҳамда бошқа шаҳарлар аҳолиси 28 июль куни соат 21:00 ларда Қозоғистоннинг Бойқўнғир космодромидан учирилган «Союз-ФГ» ташувчи ракетасининг осмондаги ёрқин изини кўришга муваффақ бўлди. Бу ҳақда Ўзбекистон Фанлар академиясининг Астрономия институтига асосланиб «Газета.uz» хабар берди.
«Бу Халқаро космик станцияга янги экспедиция билан йўл олган Россиянинг бошқариладиган «Союз МС-05» космик кемасидир. Бу каби ёғду одатда ташувчи ракетанинг иккинчи поғонаси ажралиши билан боғлиқ», — дея таъкидлади институтдагилар.
Ёруғлик двигателнинг иккинчи ва учинчи поғонасидан ажралиб чиқаётган иссиқ, кўзга кўринмас водород-кислородли аланга сабаб пайдо бўлади.
«Роскосмос»нинг маълумотларига кўра, 28 июль соат 20:41 да (Тошкент вақти билан) Бойқўнғир космодромидан бошқариладиган «Союз МС-05» кемаси билан «Союз-ФГ» ташувчи ракетаси учирилган. Унинг бортида россиялик Сергей Рязанский, америкалик Редолф Брезник ҳамда италиялик Паоло Несполи бўлган.
Ҳозирда экипаж Халқаро космик станцияга етиб борган. Космонавтлар станцияда 139 кун бўлиши режалаштирилмоқда.
Изоҳ (0)