Жанубий Корея терма жамоаси ҳужумчиси Сон Ҳён Мин “Тоттенҳэм”ни тарк этишини расман эълон қилди. Футболчи бу ҳақда Лондон клубининг Жанубий Кореядаги йиғини олдидан ўтказилган матбуот анжуманида маълум қилди.
Матбуот анжумани бошланишидан олдин шуни очиқ айтмоқчиманки, бу ёзда “Тоттенҳэм”ни тарк этаман. Раҳбарият ушбу қароримга ҳурмат билан ёндашиб, мени ҳар томонлама қўллаб-қувватлади. Ортда қанчадан-қанча ажойиб хотиралар қолди. Бу менинг футболчилик фаолиятимдаги энг оғир қарорлардан бири бўлди. Мен Лондонга 23 ёшимда, ҳали катта футбол энди кириб келаётган ёш йигитча сифатида келган эдим. Энди эса бу клубни тажрибали футболчи сифатида тарк этяпман. Мухлисларга миннатдорчилик билдираман. Чунки улар доимо мени қўллаб-қувватлаб келган. Бу ҳақда жамоадошларимга айтиш ҳам осон бўлмади. Чунки биз оила-аъзоларимиздан ҳам кўпроқ бирга вақт ўтказамиз. Қарорим қатъий, лекин қолган икки кун ичида мухлислар билан яна бир нечта илиқ, унутилмас хотираларни яратишга ҳаракат қиламан, — дейди Сон Ҳён Мин.
Маълумот учун, Сон Ҳён Мин 2015 йил Германиянинг “Байер” клубидан 30 миллион евро эвазига ўтган эди. У “Шпорлар” сафида жами 454 учрашувда майдонга тушиб, 173 та гол ва 101 голли узатма муаллифига айланган.
Изоҳ (0)