«Ўзбекистон ҳаво йўллари» Миллий авиакомпаниясининг Boeing 787 Dreamliner самолёти Тошкент—Нью-Йорк—Тошкент йўналиши бўйича дастлабки тўхтовсиз парвозни муваффақиятли якунлади. 2017 йил 28 июлда Ислом Каримов номидаги Тошкент халқаро аэропортида Dreamliner’ни тантанали кутиб олиш маросими бўлиб ўтди. Бу ҳақда Миллий авиакомпания ахборот хизмати хабар берди.
Бортида 243 нафар йўловчи бўлган Миллий авиакомпания Dreamliner’и маҳаллий вақт билан соат 12:30 да Ислом Каримов номидаги Тошкент халқаро аэропортига қўнди. Нью-Йоркдан Тошкентга тўхтовсиз парвоз 11 соат давом этди ва муваффақиятли якунланди.
«Орзулар лайнери»ни Нью-Йоркдан Тошкентга ҳаво кемаси командири Павел Моргачёв, Boeing 787 парвоз отрядининг учувчи-инструктори Алексей Маркин ва иккинчи учувчи Улуғбек Ишмаҳамедов бошқариб келди.
Dreamliner 27 июлда Тошкентдан Нью-Йоркка тўғридан-тўғри рейсни бошлаган эди. Бортида 237 нафар йўловчи бўлган ҳаво кемаси маҳаллий вақт билан 08:40 да Тошкентдан учиб кетган эди.
Тошкент—Нью-Йорк—Тошкент йўналиши бўйича Boeing 787 Dreamliner’да тўғридан-тўғри парвозларни амалга ошириш «Ўзбекистон ҳаво йўллари» Миллий авиакомпанияси йўловчиларига Нью-Йоркка бир соат тезроқ етиб бориш имконини беради. Бунда Тошкентдан Нью-Йоркка тўғридан тўгри парвоз 12 соат, тескари йўналишда эса 11 соат давом этади.
Изоҳ (0)