Хосеп Гвардиола мураббийлик фаолияти давомида трансфер бозорида 1 миллиард еврога яқин пул сарфлагани билан статистиклар эътиборига тушди. Marca нашрининг ёзишича, мутахассис ўзи ишлаган уч клуб раҳбариятидан жами 998,4 миллион евролик футболчиларни олиб беришни талаб қилган.
Гвардиоланинг энг қиммат трансфери муваффақиятсиз экани билан ажралиб туради — Златан Ибраҳимович. Швед футболчиси «Барселона» учун 69,5 миллионга тушганди. Кейин эса ўзаро келишмовчиликлар сабаб Златан Каталония клубини тарк этди.
Ўтган ҳафта «Манчестер Сити» Пеп учун «Монако»дан ҳимоячи Мендини 57 миллионга олди. Шу вақтга қадар юлдуз ҳимоячилар ҳам бундай катта нархга сотилмаганди. Натижада Менди ҳимоя позициясидагилар рекордини ўрнатди.
Статистиканинг аниқлик киритишича, Гвардиола «Барселона»да ишлаган вақтида жами 341,5 миллион евролик футболчиларни сотиб олган. Бу кўрсаткич «Бавария»да 203,9 миллионни ташкил қилган, «Манчестер Сити»да эса иккинчи йил бошланмай туриб, 453 миллионга айланиб улгурди.
Мюнхеннинг «Бавария» клуби тарихида ҳеч бир мутахассис футболчилар учун Хосеп Гвардиола каби кўп пул сарфламаган.
«Championat.asia» сайтининг ёзишича, мураббийлик фаолиятини бошлаганига 10 йил ҳам тўлмаган Гвардиола сарф этган пулга оддийроқ клубни сотиб олиб, уни бемалол топ жамоага айлантириш мумкин эди.
Изоҳ (0)