Табиий захиралар ва Шимолий Австралия ишлари бўйича вазир Мэтт Канаван унда Италия фуқаролиги ҳам мавжудлиги эҳтимоли сабаб истеъфога чиқди. Бу ҳақда «РБК» хабар бермоқда.
Сиёсатчига кўра, ўзида икки давлат фуқаролиги бўлиши мумкинлиги ҳақида онаси орқали хабар топган. Аёл Австралиянинг икки сенатори бошқа давлатлар фуқаролигига эга бўлгани учун лавозимини тарк этганидан сўнг ўғлига бу ҳақда билдиришни лозим топган.
«Онам 2006 йилда Италия консуллигига мамлакат фуқаролигини беришни сўраб, мурожаат қилган. Ҳойнаҳой, у менга ҳам Италия фуқаролиги берилишини сўраган», — таъкидлади вазир. Мэтт Канаван ўша пайтда 25 ёшга тўлган ва ҳеч қачон Италияда бўлмаганди.
Сиёсатчи лавозимини тарк этди, бироқ чет давлат фуқаролиги масаласи ойдинлашгунча сенатдаги ўрнини сақлаб қолди.
Австралия конституциясига мувофиқ, хориж фуқаролигига эга шахс парламентга сайланиши мумкин эмас. Ҳукумат аъзолари эса парламент депутати бўлиши лозим.
Изоҳ (0)