Tabiiy zaxiralar va Shimoliy Avstraliya ishlari bo‘yicha vazir Mett Kanavan unda Italiya fuqaroligi ham mavjudligi ehtimoli sabab iste’foga chiqdi. Bu haqda “RBK” xabar bermoqda.
Siyosatchiga ko‘ra, o‘zida ikki davlat fuqaroligi bo‘lishi mumkinligi haqida onasi orqali xabar topgan. Ayol Avstraliyaning ikki senatori boshqa davlatlar fuqaroligiga ega bo‘lgani uchun lavozimini tark etganidan so‘ng o‘g‘liga bu haqda bildirishni lozim topgan.
“Onam 2006-yilda Italiya konsulligiga mamlakat fuqaroligini berishni so‘rab, murojaat qilgan. Hoynahoy, u menga ham Italiya fuqaroligi berilishini so‘ragan”, — ta’kidladi vazir. Mett Kanavan o‘sha paytda 25 yoshga to‘lgan va hech qachon Italiyada bo‘lmagandi.
Siyosatchi lavozimini tark etdi, biroq chet davlat fuqaroligi masalasi oydinlashguncha senatdagi o‘rnini saqlab qoldi.
Avstraliya konstitutsiyasiga muvofiq, xorij fuqaroligiga ega shaxs parlamentga saylanishi mumkin emas. Hukumat a’zolari esa parlament deputati bo‘lishi lozim.
Izoh (0)