Туркия президенти Ражаб Тоййиб Эрдўғон 23 июль, якшанба куни Форс кўрфазидаги учта мамлакат бўйлаб турнега отланади, булар Саудия Арабистони, Қатар ва Кувайт, деб ёзади «ТАСС».
У Саудия Арабистони қироли Салмон бин Абдул Азиз Ал Сауд, Кувайт амири шайх Сабоҳ ал-Аҳмад ал-Жабир ас-Сабоҳ ва Қатар амири шайх Тамим бин Ҳамад ал Таний билан музокаралар олиб бориши кутилмоқда.
Эрдўғоннинг икки кунлик сафаридан бош мақсад — Қатар атрофидаги инқирозга алоқадор мамлакатлар ўртасида муносабатларни йўлга қўйиш.
5 июнь куни Саудия Арабистони, БАА, Баҳрайн ва Миср Қатарни терроризмни қўллаб-қувватлашда ва уларнинг ички ишларига аралашишда айблаб, у билан дипломатик алоқаларни узганлигини эълон қилган эди. Шундан кейин Қатарга нисбатан иқтисодий санкциялар ва транспорт қамали жорий қилинди. Қатар ҳукумати афсус билдирди ва чет эллик шерикларининг қарорларини асоссиз деб атади.
Кейинроқ Саудия Арабистони, БАА, Баҳрайн ва Миср 13 та талабни илгари сурди, уларни Доҳа рад этди. 5 июль куни Қоҳирада «квартет» ташқи ишлар вазирлари учрашиб, алоқаларни қайта тиклаш учун Қатар раҳбарияти риоя қилиши керак бўлган олтита тамойилни белгилаб берди.
Изоҳ (0)