Ҳар куни вазнни ўлчаш озишга ёрдам берадими?

Биз тарозида кўрадиган вазннинг ҳар куни ўзгариб туриши ёғ тўқималарининг камайгани ёки кўпайганини билдирмайди. Унга қараб фақат тўртта омил ҳақида хулоса қилишимиз мумкин, булар: нажас ва пешоб массаси, углеводлар истеъмоли ва қон ҳажми.

Аммо вазн ўзгариб туришининг асосий сабаби — гликоген, яъни организмда глюкозанинг бош захираси сифатида хизмат қилувчи полисахарид қатлами. Агар уч кун давомида паст углеводли овқатларни есак, гликоген миқдори учдан икки қисмга камайиб кетиши мумкин. Бу эса умумий вазнда ўз аксини топади, ахир гликоген жигаримиз оғирлигининг 5—10 фоизини, мушаклар оғирлигининг эса 2 фоизини ташкил этади.

Организмимизда ўртача 500 граммча гликоген бўлади, шу туфайли, ҳар куни истеъмол қилинадиган углеводлар миқдори сиз тарозида кўрадиган рақамларда сезиларли тарзда акс этади.

Олимлар нима дейди?

Сўнгги тадқиқотлар ҳар куни вазнини ўлчаб кўрган иштирокчиларнинг вазни сезиларли равишда камайганини кўрсатди. Натижалар қуйидагича бўлди:

• Олти ой давомида ҳар куни ўзини тарозига тортган кишилар назорат гуруҳидан кўра, олти кг кўпроқ вазн йўқотган.
• Назорат гуруҳининг ҳатто ҳафтасига беш марта вазнини ўлчаган иштирокчилари ҳам ҳар куни тарозига чиққан кишиларга нисбатан камроқ вазн йўқотган.
• Ҳар куни ўзини тарозига тортган кишилар энг кўп соғлом ҳаёт тарзига риоя қилишга интилган (масалан, камроқ фастфуд еб, телевизор қаршисида камроқ ўтирган).

Демак ҳар куни ўзини тарозига тортиб кўриш озишга ёрдам берарканда?

Барчаси ҳар бир кишига боғлиқ

Ҳар куни вазнингизни ўлчаб, барқарорлик билан озаётган вақтингизда, айнан тарозида тортилиш натижаларга таъсир қилаётгандек туюлади. Аммо бир кунгина ортиқча овқат еб қўйсангиз, эртаси куни вазнингизни ўлчагингиз келмайди. Ва агар ҳар куни кимгадир ҳисоб беришингиз керак бўлмаса, вақт ўтгани сари нафақат тарозига тортилишни, балки тўғри овқатланишни ҳам ташлаб қўйишингиз эҳтимоли катта.

Бундан ташқари, вақт ўтиши билан ҳар кун вазн ўлчашдан чарчашингиз, бу жонингизга тегиб қолиши мумкин. Буни тадқиқот ҳам тасдиқлади: тажриба бошланганидан кейин бир ярим йил ўтгач, ҳар куни вазн ўлчаб кўришдан самара ҳам анча камайган.

Манба: «Wclub.ru»