Журналист Дилдора Юсуфбекова Ўзбекистонда хизмат кўрсатган артист Сейдулла Молдаханов билан интервью уюштирди. Суҳбатни «Darakchi.uz» эълон қилди. Унда актёр ўзининг бахтли турмуши сири ҳақида гапирар экан, муҳаббат, ўзаро ҳурмат ва ишончни тилга олди.
«Рафиқам рус миллатига мансуб, аммо шарқона тарбия кўрган. Мени тушуниб, қўллаб-қувватлаб ва меҳр кўрсатиб яшаяпти! Бу йил турмуш қурганимизга 36 йил бўлади, 4 йил бир-биримизни синаганмиз. Демак, 40 йилдан бери биргамиз. Ҳозир ҳам кунига ўн марталаб қўнғироқлашамиз, бир-биримизни соғинамиз, бахтли турмуш сири шу бўлса керак-да. Очиғи, бир неча марталаб уйланадиган эркакларни тушунмайман, ҳеч кимни севмаганми улар? Бир пайтлари ишсиз ҳам юрдим. Етти йиллар чамамда, суратга тушмадим, театрдан кетдим, ўша дамларда рафиқам менга далда бўлди. Актёрлардаги кризис даври қийин кечади, айримларнинг тоқати етмай енгилади. Яқин дўстларим орасида ҳам шундайлари бўлган, шукр, оиламнинг кўмаги билан мен улардан ўтолдим», — деди актёр.
Изоҳ (0)