Россия Давлат думаси учинчи ўқишда фуқаролик ва хорижий фуқароларнинг ҳуқуқий ҳолати тўғрисидаги қонунларга ўзгартиришларни қабул қилди. Бу ҳақда «Ведомости» хабар бермоқда.
Дастлаб ҳужжатда фақат терроризм ва экстремизм учун жазога ҳукм қилинган шахсларни фуқароликдан маҳрум этиш ҳақида сўз юритилганди, бироқ кейинчалик бўлажак Россия фуқаролари учун қасамёд ва мамлакат фуқаролигини олаётган украиналиклар учун махсус имтиёзлар билан тўлдирилди.
Қонун лойиҳаси тайёрланишига шу йилнинг 3 апрель куни Санкт-Петербург метросида содир этилган теракт туртки берди. Уни амалга оширган шахс Россия фуқаролигини олган чет эллик эди.
Қасамёд ғояси президент Владимир Путиннинг Дума раиси Вячеслав Володин билан учрашувидан сўнг лойиҳага киритилди. Бўлажак фуқаролар Россияга содиқ бўлиш, унинг қонунларига риоя этиш, маданияти, тарихи ва анъаналарини ҳурмат қилишга қасам ичади.
Изоҳ (0)