Бош прокуратура ҳузуридаги Мажбурий ижро бюроси директори Ботир Қудратхўжаев ЎзАга берган интервьюсида газ ва электр таъминоти соҳасидаги, асосан тўловларни ундиришга жавобгар бўлган назоратчилар томонидан амалга оширилган жиноятлар ҳақида гапириб берди.
Фирибгарлик, порахўрлик ва энергия ресурслари истеъмоли учун тўловлардан келиб тушган маблағларни ўғирлаш ҳолатлари юзасидан жами 40 та жиноий иш қўзғатилган, шуларнинг 18 таси назоратчиларга нисбатан очилган. 13 та ҳолатда истеъмолчилардан қарздорликни «бартараф қилиш» учун поралар олинган.
Чунончи, Бухоро туман газ таъминоти корхонаси назоратчиларидан бири икки истеъмолчининг 4,6 миллион сўм миқдоридаги қарзини «ёпиш» учун улардан 400 доллар ва 2 миллион сўм олган. Истеъмолчиларга тўлов амалга оширилгани ҳақида қалбаки ҳужжатлар берилган.
Сирдарё вилояти Мирзаобод туман электр тармоғи корхонаси ишчиларидан бири истеъмолчининг 1,2 миллион сўм қарзини «ёпиш» учун 700 минг сўм пул олди. Текширув чоғида у бундай ноқонуний ҳаракатларни яна 417 марта амалга ошириб, давлатга 31,3 миллион сўм зарар етказгани аниқланди.
Изоҳ (0)