Бугунги кунда Андижондаги GM Uzbekistan автомобиль заводида Chevrolet бренди остида Spark, Lacetti, Cobalt, Оrlando, Captiva, Lаbо, Malibu каби халқаро стандартларга жавоб берадиган замонавий автомобиллар ишлаб чиқарилмоқда, улар нафақат Ўзбекистонда, балки хорижда ҳам харидоргир, деб хабар берди ЎзА.
Ўтган йилдан эътиборан Т-250 лойиҳаси доирасида «Евро-5» талабларига мос Ravon бренди остидаги дастлабки Nexia-R3 автомобиллари харидорларга етказиб берила бошланди. Италия технологияси асосида метан газига мослаштирилган Ласетти ишлаб чиқариш бўйича дастлабки қадам қўйилди.
Корхонамизнинг бош шиори — харидорлар талаб ва истагидан келиб чиққан ҳолда, хавфсиз ва қулай замонавий русумдаги автомобиллар ишлаб чиқариш. Шу мақсадда янги русумдаги моделларни жорий этиш устидаги ишлар изчил давом эттирилмоқда. Ватанимиз мустақиллигининг 26 йиллик байрамига халқимизга янги русумдаги автомобилларни тақдим этишни режалаштирганмиз.Бироқ ҳозирча айнан қандай русумдаги янги автомобиллар ишлаб чиқарила бошланиши очиқланмади.Рустам Ражабов, GM Uzbekistan АЖ бош директори вазифасини бажарувчи.
Йилига 300 мингга яқин автомобиль ишлаб чиқариш қувватига эга GM Uzbekistan АЖда бугунги кунда 10 мингдан зиёд ишчи-ходим меҳнат қилмоқда. Уларнинг 70 фоизи ёшлардир.
Ўзбекистон Президенти Шавкат Мирзиёевнинг жорий йил 26 майдаги «General Motors Узбекистан АЖ ишлаб чиқараётган маҳсулотларга нархлар шаклланишини такомиллаштириш чора-тадбирлари тўғрисида»ги қарори асосида шу йилнинг 1 июнидан бошлаб GM Uzbekistan АЖнинг барча автомобиль моделларини ички бозорда миллий валюта — сўмга сотиш йўлга қўйилди.
Ички бозорда автомобилларни сотиш бўйича электрон база шакллантирилган. У 2 босқичда амалга оширилади. Дастлабки босқичда харидорлардан электрон аризаларни қабул қилиш ва электрон навбат йўлга қўйилган бўлиб, иккинчи босқичда ягона портал орқали шартномалар расмийлаштирилади.
Изоҳ (0)