Ўзбекистон шифокорлар термаси Буюк Британияни таслим қилиб, ЖЧ ярим финалига чиқди

Австрия мезбонлик қилаётган футбол бўйича Morell Cup турнирида Ўзбекистон шифокорлар терма жамоаси ярим финалга йўл олди.

Бразилия, Австрия, АҚШ каби термалар жой олган «А» гуруҳини пешқадам сифатида якунлаган ўзбекистонлик шифокорлар, чорак финалда Буюк Британияга қарши саф тортди. Беллашувнинг 25-дақиқасида Тошкент оилавий шифохонаси (Tashkent City Family Clinic) отоларингологи Насриддин Ҳасанов урган ягона гол жамоани ярим финалга олиб чиқди.

Британияликлар гуруҳ босқичида Россия билан 0:0 ҳисобида дуранг ўйнаган, Австралия (3:0) ва Аргентина (2:0) термаларини мағлуб этганди. Бунда улар ўз дарвозаси даҳлсизлигини сақлаб қолганди.

Чорак финалнинг қолган ўйинлари бугун кечгача бўлиб ўтади. Шундан сўнг Ўзбекистон шифокорларининг финал остонасидаги рақиби аниқ бўлади.

Morell Cup Чорак финал 13 июль, пайшанба

Ўзбекистон — Буюк Британия 1:0