Нигериянинг Борно штати пойтахти Майдугурида юз берган тўрт портлаш оқибатида 17 киши ҳалок бўлди, 21 киши тан жароҳати олди. Бу ҳақда Reuters хабар бермоқда.
Маҳаллий полиция раҳбари маълумотларига кўра, шаҳарнинг турли бурчакларида юз берган терактларнинг бари террорчи-худкушлар томонидан амалга оширилган.
Борно штати Нигерия ҳукумати ва «Боко Ҳарам» террорчилик ташкилоти ўртасидаги қуролли курашдан энг кўп жабр кўрган ҳудудлардан бири ҳисобланади.
2016 йилнинг декабрь ойида Нигерия ҳарбийлари «Боко Ҳарам»нинг сўнгги қўрғони — Самбиса ўрмонини эгаллаганини эълон қилган, Нигерия президенти Муҳаммаду Бухорий эса жангарилар тўла тор-мор этилгани ҳақида баёнот берган эди.
Бироқ орадан бир неча ой ўтиб, террорчилик ташкилоти ўз ҳужумларини қайтадан бошлади. Маълумот учун, «Боко Ҳарам» 2002 йилда ташкил топган ва асосан Нигерия ҳудудида ҳаракат қилади. 2015 йили ташкилот ИШИДга содиқлик ҳақида қасамёд қилган.
Изоҳ (0)