Германияда Қадимги Юнонистоннинг Парфенон ибодатхонаси нусхаси яратилди. У тақиқланган китобларда ясалгани диққатга сазовор, деб хабар беради TJournal.
Аргентиналик рассом Марта Минухин Кассель шаҳрида ёрдамчилари билан бирга Парфенон нусхасини яратди. Обида дунёнинг турли мамлакатларида тақиқланган 100 минг нусха китобдан барпо этилди.
Ибодатхона Documenta 14 халқаро замонавий санъат кўргазмаси доирасида қурилди. Муаллифнинг сўзларига қараганда, у сиёсий тазйиққа қаршилик кўрсатиш рамзи ўлароқ қад кўтариб турибди.
Инсталляция учун махсус юборилган китоблар пўлат конструкцияга мустаҳкамланиб, пластикка ўралди. Жами 170 номдаги турли китоблар ишлатилди, улар орасида Сервантеснинг «Дон Кихот», Ремаркнинг «Ғарбий фронтда ўзгариш йўқ» ва Пастернакнинг «Доктор Живаго» асарлари бор.
Инсталляцияда энг машҳур тақиқланган китоблардан бири — Гитлернинг «Майн Кампф» китоби ишлатилмади. Минухин нацистларнинг цензура сиёсатига қаршилигини ифодалаш учун инсталляцияни улар 1933 йили 2 мингга яқин китобни ёқиб юборган ерга ўрнатди.
Изоҳ (0)