Россия халқ артисти, таниқли театр ва кино актёри, шоир ва носир Юрий Стояновнинг Тошкентдаги «Истиқлол» санъат саройидаги концерти катта муваффақият билан ўтди, деб ёзади «Культура.уз».
Актёр Тошкентга нисбатан алоҳида муҳаббат ҳис қилишини айтди. Гап шундаки, Иккинчи жаҳон уруши бошида Ўзбекистонга эвакуация қилинган минглаб қочоқлар орасида унинг онаси, Евгения Леонидовна Стоянова ҳам бўлган. У ҳали ҳам ҳаёт ва ўзбек халқининг оғир даврлардаги меҳрини ҳамон хотирлайди, деб ёзади нашр.
Ўзбекистон ҳақидаги таассуротлари билан ўртоқлашар экан, Юрий Стоянов ажойиб замонавий шаҳар бўлмиш Тошкентга қойил қолгани, бу ердаги томошабинлар ажойиблигини таъкидлади. «Мен бу ерни ота-онам олдидаги бурчимни бажарганлик ҳисси билан тарк этаман. Мен бу ерга келиб кетишим керак эди. Менинг онам бу шаҳардан ўз ҳаёти учун қарздор. Бизнинг уйимизда энг севимли егуликлар доимо ўзбек нони ва палов бўлган», — деди артист.
У онасининг илтимоси билан у ўқиган мактабда бўлгани, уни илиқ кутиб олишганини айтди. Онасига у ерда тушган суратлари, Тошкентдаги концерти видеосини олиб боришини, онаси ўғлини бу ерда яхши кўришларини билиб, қувонишини айтди.
Изоҳ (0)