Озодбек Назарбеков: «Ёшлар» телеканалини катта ўзгаришлар кутмоқда ва бу ўзгаришлар жуда тез бўлади

Халқаро пресс-клубнинг ёшлар сиёсатига бағишланган 3 июлдаги анжуманида ЎзМТРКнинг «Ёшлар» телеканали янги раҳбари — Ўзбекистон ва Қорақалпоғистон халқ артисти Озодбек Назарбеков ҳам қатнашди. Хонанда раҳбарлигидаги телеканалда қандай ўзгаришлар бўлиши ҳақидаги савол тадбирнинг энг кутилган ҳам қизиқарли лаҳзаларидан бири бўлди.

Озодбек Назарбеков саволга жавоб бераркан, «Бунинг телевидениега нима алоқаси бор?», дея ушбу тайинланувни танқид қилаётганларга ҳам муносабат билдириб ўтди.

22 ёшли Алишер Саъдуллаевнинг вазир ўринбосари этиб тайинланиши воқеаси каби, мен ҳақимда ҳам: «Бунинг телевидениега нима алоқаси бор?», деган гаплар бўляпти. Тош отиш — энг осон иш. Тош отиш учун у одам ҳақида ҳеч нарса билмасликнинг ўзи етади.

Анча йиллардан бери, санъатнинг қайси йўналиши бўлишидан қатъий назар, соҳадаги камчилик ва ютуқларни ўзим табиий равишда, эҳтимол касб тақозоси билан, беихтиёр кузатиб келаман. «Ёшлар» телеканалини жуда катта ўзгаришлар кутяпти. Жуда ҳам катта ўзгаришлар! Буни яқин кунларда мухлислар сеза бошлайди.

«Ёшлар» телеканалига раҳбарликка тайинланишим мен учун кутилмаган таклиф бўлди, шундай бўлса-да, кузатишларим давомида ўйлаб қўйган маълум бир режаларим, фикрларим, лойиҳаларим бор эди. Телеканалдаги ўзгаришлар секин-секин эмас, жуда тез бўлади.

Озодбек Назарбеков, Ўзбекистон ва Қорақалпоғистон халқ артисти, «Ёшлар» телеканали раҳбари

Ёшлар Пресс-клуби ташкил этиляпти. Озодбек айтаётган нарсалар учун саҳна айнан шу пресс-клуб бўлади. Худо хоҳласа, бу лойиҳани биргаликда амалга оширамиз.

Қаҳрамон Қуронбоев, Ўзбекистон Ёшлар иттифоқи раиси