Ўзбекистон Республикасининг мавжуд қонунчилигига кўра, ун, шакар, ёғ, маргарин, қуруқ сут, болалар озиқ-овқати, чой, макарон, қандолат маҳсулотлари, гўшт, балиқ, пишлоқ, колбаса маҳсулотлари, спиртсиз ичимликлар билан савдо қилишда мулкий шакллардан қатъи назар барча зарурий ускуналар билан жиҳозланган, савдо қоидаларига риоя қилган ҳолда, маҳсулотнинг яроқлилик муддати, сифатига тегишли сертификатлар, шунингдек, қонунчиликда ўрнатилган бошқа талабларга жавоб берган тақдирдагина стационар савдо ташкилотларида жисмоний ҳамда юридик шахслар томонидан амалга оширилади, деб хабар берди Давлат солиқ қўмитасининг матбуот хизмати.
Шу билан бирга ўсимлик мойи, спиртли ичимликлар ва тамаки маҳсулотлари билан савдо назорат касса аппаратлари ва ҳисоб терминаллари ўрнатилган, юридик шахс шаклида чакана савдо қиладиган стационар савдо нуқталарида амалга оширилади.
Бироқ кичик бизнес ҳамда хусусий тадбиркорликда Ўзбекистон Республикаси қонунчилигини четлаб ўтадиган, ўзининг фойдасини кўзлаб адолатли рақобат муҳитини бузадиганлар ҳам учраб туради.
Масалан, Хоразм вилояти Урганч шаҳрида давлат солиқ инспекцияси ходимларининг ваколатли тармоқ вакиллари билан биргаликда М.Худойберганов кўчасида ўтказган назорат тадбири давомида, ушбу кўчага ўсимлик мойи билан савдо қилувчи бешта кичик ўлчамли махсус бино қурилгани маълум бўлди. Хусусан, Ш.Р. исмли фуқаро санитар талабларга жавоб бермаган ҳолда 295 литр ўсимлик мойини сотгани учун унга нисбатан ўрнатилган тартибларга кўра далолатнома тузилди.
Фуқаро Ш.Р. ўзининг ноқонуний фаолиятини тан олиш ўрнига, ўсимлик мойининг мусодара қилинишига тўсқинлик қилиб, тўполон кўтарди. Шу билан бирга у ўзи каби ноқонуний тадбиркорларни ва бошқа манфаатдор шахсларни ёнига чақириб, сунъий равишда можароли вазиятни яратишга ҳаракат қилди. Назорат тадбири давомида сохта тадбиркор Ш.Р. ўз вазифасини бажараётган давлат солиқ қўмитасининг ходимларига тан жароҳат етказди. Айни вақтда содир этилган ушбу жиноий ҳаракат билан Урганч шаҳрининг ички ишлар бўлими шуғулланмоқда.
Изоҳ (0)