Олмалиқ шаҳрида 2015 йилнинг декабрь ойидан шу кунга қадар бир неча фуқароларни алдаб, ишончини суиистеъмол қилиб, моддий манфаатдорлик эвазига ишларини битириб беришини айтиб, фирибгарлик қилган шахслар қўлга олинди. Бу ҳақда Тошкент вилояти ИИБ маълум қилди.
Чирчиқ шаҳрида яшовчи вақтинча ишсиз 1974 йилда туғилган Истам Аширметов ва унинг хотини, уй бекаси 1983 йилда туғилган Нуржан Нурсултонова фирибгарлик йўли билан Олмалиқ шаҳрида яшовчи уй бекаси 1976 йилда туғилган Аида Топилова, 1979 йилда туғилган Малика Шораҳмедова, 1978 йилда туғилган Норинисо Ҳатамова ва Юқори Чирчиқ туманида яшовчи уй бекаси 1987 йилда туғилган Олия Рахматованинг ишончига кирган.
Эри-хотин юқоридаги фуқаролардан «Бўстонлиқ тумани Ғазалкент шаҳрида уларга мерос бўлиб қолган дала ҳовлини расмийлаштириш учун», деб алдаб, улардан 76 500 000 сўм, 6700 АҚШ доллари ва қиймати 50 100 000 сўм бўлган тилла тақинчоқлари ва уй жиҳозларини олиб, ўз эҳтиёжлари учун ишлатиб юборган.
Ҳозирда фирибгарларга нисбатан Ўзбекистон Республикаси Жиноят Кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)