Ташқи меҳнат миграцияси агентлиги «Донской текстил» билан тикувчиларни ишга юбориш бўйича келишув имзолади

Ташқи меҳнат миграцияси агентлигида Россиянинг «XИМПЭК» компаниялар гуруҳи делегацияси билан учрашув бўлиб ўтди. Бу ҳақда агентлик матбуот хизмати хабар бермоқда. 

Учрашув давомида ходимлар билан ишлаш бўйича директор Т. Андреева «XИМПЭК» ва унинг Ростов вилоятидаги фаолияти ҳақида ҳикоя қилди. Бу ерда мебел ишлаб чиқариш йўлга қўйилган, гуруҳ таркибига кирувчи «Донской текстил» МЧЖ жойлашган. Мазкур тикув корхонаси агентлик билан Ўзбекистондан уюшган ишчи кучини танлаб олиш борасида ҳамкорлик қилишни режалаштирмоқда. Ҳозирда «Донской текстил»да Ўзбекистонлик 15 киши меҳнат қилмоқда. 

Т. Андреева ишчи-ходимларнинг корхонада меҳнат, дам олиш ва яшаш шароитлари тасвирланган видео ва фотоматериаллар билан таништирди. Корхона ходимларни яшаш учун барча шароитлар — кенг турар-жойлар, телевизор ва микротўлқинли печлар қўйилган ошхоналар, замонавий машиналар билан жиҳозланган кир ювиш хоналарига эга бепул ётоқ билан таъминлайди.

Шунингдек, «Донской текстил» йил мобайнида ишлаган тақдирда ўз ҳисобидан сафар харажатларини қоплаш, ходимнинг бўлажак маоши ҳисобидан рухсат бериш ҳужжатларини (патент) расмийлаштиришни зиммасига олишга тайёр. 

Учрашув якунида Ташқи меҳнат миграцияси агентлиги ва «Донской текстил» МЧЖ ўртасида Ўзбекистон фуқароларини корхонада ишлашга жалб этиш бўйича келишув имзоланди.