«Ижтимоий фикр» жамоатчилик фикрини ўрганиш маркази томонидан ўтказилган навбатдаги социологик тадқиқот иштирокчилари учун Ўзбекистоннинг дунёдаги нуфузи ва ўрни, миллий мустақиллик муҳим жиҳат ҳисобланади. Бу ҳақда «Халқ сўзи» хабар бермоқда.
Респондентларнинг 72,4 фоизи фикрига кўра, мустақиллик уларга эртанги кунга ишонч, 52 фоизига эса ўз келажагини эркин белгилаш, барпо этиш имкониятини берди. Тадқиқот иштирокчиларининг мутлақ кўпчилиги Ўзбекистоннинг байроғини кўриб, давлат мадҳиясини эшитганда ғурур туйғусини ҳис қилишларини ифодалаган (жорий йилда 92,4 фоиз, 2015 йилда 89,2 фоиз эди).
Респондентларнинг 88 фоизи Ўзбекистонда барча фуқаролар учун миллий мансублиги ва диний эътиқодидан қатъи назар, тенг ҳуқуқ ва имкониятлар Конституция билан кафолатланганлигини қайд этган. Уларнинг кўпчилиги (98,4 фоиз) ўзларини тўлақонли Ўзбекистон фуқаролари сифатида ҳис қилади.
Сўров натижаларида фуқароларнинг ўзини ўзи бошқариш органларининг мамлакат аҳолиси фуқаролик позициясини мустаҳкамлашдаги ўрни ортиб бораётгани ўз ифодасини топган (70 фоиз). Айни пайтда, 66 фоиз респондентлар фикрича, таълим муассасалари миллий ўзликни англашга таъсир қилувчи муҳим омил саналади. Ўтган йиллардаги тадқиқотлар билан қиёслаганда, миллий-фуқаролик позициясини шакллантиришда оиланинг роли бирмунча пасайган, яъни 55,1 фоизни ташкил қилди (2015 йилда бу 89,7 фоиз эди).
Тадқиқотда аён бўлишича, оилаларда, асосан, ўзбек тилида гаплашилади (88 фоиз). Айни пайтда кўпчилик Ўзбекистонда яшовчи миллат ва элатларнинг тили ҳамда маданиятини ривожлантириш, хорижий тилларни, айниқса, рус тилини ўрганиш учун зарур шарт-шароитларни яратиш мақсадга мувофиқлиги ҳақида фикр билдирди (53 фоиз). Бундай фикрлар Самарқанд, Навоий, Фарғона ҳамда Қашқадарё вилоятларида кўпроқ эканлиги кузатилди.
Ўзбекистонликларнинг кўпчилиги, яъни 73,8 фоизи ўз халқининг урф-одатлари ва анъаналарини яхши билади. Бу кўрсаткич 16 — 29 ёшли респондентларда қарийб икки мартага ортган (62,8 фоиз). Анъаналар ва урф-одатларга тўла даражада амал қиладиган ўзбекистонликлар сони анча ўсди (65,2 фоиз, 2015 йилда 49,5 фоиз). Респондентларнинг 31,5 фоизи ўз маънавий эҳтиёжларига мувофиқ келадиган анъаналар ва урф-одатларга риоя этишини маълум қилган.
Изоҳ (0)