Электр, иссиқлик ва газ тармоқларига ўзбошимчалик билан уланганлик ва тамғаларни бузганлик учун жазолар қатъийлаштирилди

Ўзбекитон Президенти Маъмурий ва Жиноий кодексларга тузатишлар киритди, деб ёзади «Kommersant.uz».

Уларга мувофиқ, умумий фойдаланишдаги электр, иссиқлик ва газ тармоқларига ўзбошимчалик билан уланганлик учун жарима ошди. Энди фуқаролар учун маъмурий жазо энг кам ойлик иш ҳақининг 2—3 баробари эмас, балки 5—10 баробарига, юридик шахслар учун эса 10—20 баробарига тенг бўлди (аввал 3—7 баробари эди).

Бундан ташқари, энди жарималар нафақат электр, иссиқлик энергияси, табиий газ ҳисоблагичларини, балки уларнинг тамғаларини қасддан бузганлик учун солинади.

Шунингдек, водопроводдан фойдаланиш қоидаларининг бузилиши ҳақидаги моддага тузатиш киритилди. Совуқ ёки иссиқ сув ҳисоблагичларини, шу жумладан, уларнинг тамғаларини қасддан бузганлик учун фуқаролардан энг кам ойлик иш ҳақининг 5 баробаридан 10 баробаригача, мансабдор шахслардан эса 10 баробаридан 20 баробаригача жарима ундирилади.

Бундай қоидабузарликлар маъмурий жазо қўлланилганидан кейин ҳам амалга оширилса, Жиноий кодексга киритилган янги тузатишларга мувофиқ, энг кам ойлик иш ҳақининг 25 баробаридан 75 баробаригача ёки 240 соатгача мажбурий жамоат ишлари ёки бир йилгача ахлоқ тузатиш ишлари билан жазоланади.

Худди шу хатти-ҳаракатлар натижасида етган аҳамиятли, йирик ёки ўта йирик зарарлар учун ҳам алоҳида жазолар тайинланди.