Россиянинг Вологда вилоятидаги қамоқхона касалхонасида жиноят олами раҳнамоларидан бири Лом-Али Гайтукаев 59 ёшида ўлди. Бу ҳақда «Коммерсант.ru» хабар бермоқда.
Тергов уни қотилликлар учун буюртмалар қабул қиладиган диспетчер деб ҳисобларди. Гайтукаев «Новая газета» шарҳловчиси Анна Политковская ўлдирилишини уюштиргани учун умрбод қамоқ жазосини ўтаётганди.
Шунингдек, у Forbes журналининг Россиядаги нашри бош муҳаррири Пол Хлебников отиб ташланишига тўғридан тўғри алоқадорлиги тахмин қилинади.
Гайтукаевнинг жасадини олиб кетиш учун Вологдага унинг икки қариндоши келди. Улардан бири — Тамерлан Маҳмудовнинг айтишича, тобут машинада Москвага ва у ердан самолётда Чеченистонга етказилади. Лом-Али Гайтукаев ўзи туғилиб ўсган Ачхой Мартан қишлоғидаги қабристонда кўмилади.
Изоҳ (0)