АҚШ президенти Дональд Трампнинг маъмурияти ўз вақтида Барак Обама бошчилигида Оқ уй томонидан тўхтатиб қўйилган ноқонуний муҳожирларни депортация қилиш жараёнини қайта тиклади. Бу ҳақда Reuters агентлиги суд ҳужжатларига асосланиб маълум қилди, деб хабар берди «Газета.ru».
Агентлик ушбу вазиятга АҚШга Сальвадордан ноқонуний кириб келган ва 2005 йилдан бери мамлакат ҳудудида истиқомат қилаётганига қарамай ҳамон қонунан фуқароликни олмаган рассом Жилберто Веласкесни мисол қилиб кўрсатди.
2011 йилда Обама АҚШ билан алоқаси бор ҳамда жамият учун хавф туғдирмайдиган ноқонуний муҳожирлар депортациясини бекор қилган эди. Шу сабаб Веласкес АҚШда яшашни давом этган.
Бироқ ўтган ойда Веласкес уни мамлакат ҳудудидан депортация қилиш иши қайта кўриб чиқилиши ҳақида билдиришнома олган.
Reuters маълумотларига кўра, Трамп маъмурияти Обама даврида депортация қилинмасликка қарор қилинган юзлаб ноқонуний муҳожирлар ишини қайта кўриб чиқадиган бўлди.
Таъкидланишича, прокурорлар 1 мартдан 31 майга қадар ноқонуний муҳожирлар бўйича 1329 та ишни қайта кўриб чиқишга қарор қилди. Таққослаш учун: Обама даврида 2016 йил давомида бу каби ишларнинг 430 таси кўриб чиқилган.
Изоҳ (0)