Ўзбекистон маҳсулотлари ЭКСПО – 2017 халқаро кўргазмасида намойиш этилмоқда

Саноатлаштириш рамзи, техник ва технологик ютуқлар намойиши учун очиқ платформа ҳисобланган бутунжаҳон кўргазмаси ЭКСПОга бу йил Остона шаҳри мезбонлик қилмоқда. Кўргазма 93 кун давом этиб, мамлакатлар ўртасидаги ҳамкорликни янада ривожлантиришга ва халқаро майдонда бир-бирини қўллаб-қувватлашга хизмат қилади. ЭКСПОнинг расмий очилиш маросими 2017 йил 9 июнда ўтказилди. Бу ҳақда ЎзА хабар берди.

ЭКСПО – 2017 кўргазмасида Ўзбекистон, Россия, АҚШ, Хитой, Германия, Буюк Британия, Франция, Япония, Жанубий Корея, Туркия, Ҳиндистон, Вьетнам, Арманистон, Покистон, Озарбайжон, Беларусь, Куба, Туркманистон, Руминия, Бразилия сингари 120 дан зиёд давлат ўзининг технологик, илмий, маданий ютуқларини намойиш этмоқда. Шунингдек, 20 дан ортиқ халқаро ташкилот иштирок этмоқда.

ЭКСПО – 2017 халқаро ихтисослаштирилган кўргазманинг асосий мавзуси «Келажак энергияси» деб номланган бўлиб, сайёрага катта таъсир кўрсатаётган энергия истеъмоли муаммоси жаҳон ҳамжамиятини ташвишга солаётганини ўзида акс эттиради. Унинг моҳиятини «Углерод диоксиди чиқаришни қисқартириш», «Энергия самарадор турмуш тарзи», «Энергия барча учун» сингари мавзуларда ўтказиладиган семинарлар очиб беради.

Кўргазма мажмуи Илғор технологиялардан фойдаланган ҳолда бунёд этилган мовий ранг сфера атрофида жойлашган. Унинг майдони 174 гектар бўлиб, у ердан жами 36 та объект ўрин олган.

Ўзбекистонда ишлаб чиқарилган маҳсулотларнинг намойиши учун икки қаватли бино ажратилган. Кириш қисмида GM Uzbekistan маҳсулоти – Cobalt автомобили қўйилган. Павильон асосий эшигининг тепа қисмига йирик монитор ўрнатилган. Унда Ўзбекистоннинг бой маданий мероси, тарихий обидалари, миллий урф-одат ва анъаналари, иқтисодий салоҳияти, туристик масканлар, мамлакатда етиштирилган мевалар намойиш этилмоқда.

Ўзбекистон павильонининг биринчи қавати 630 квадрат метр майдонни эгаллаган. Бу ерда қуёш, шамол ва сув, яъни келажак энергияси маҳсулотлари намойиш этилмоқда.

Ўзбекистон павильонидан ўрин олган қуёш энергияси стендида 2030 йилда автомобилларни қуёш нури ёрдамида қандай қувватлантириш мумкин экани намойиш этилмоқда.

Умумий майдони 550 квадрат метрни ташкил этган иккинчи қаватда мамлакатнинг транспорт ва логистика, туризм соҳалари ҳамда озиқ-овқат, вино ва шарбат тайёрлаш саноатида эришилган ютуқлар, миллий таомлар намойиш этилмоқда.