Ўзбекистон Президенти Шавкат Мирзиёев томонидан эълон қилинган «Халқ билан мулоқот ва инсон манфаатлари йили»да белгиланган топшириқларни амалга ошириш доирасида 2017 йилнинг 5 июль куни Тошкент вақти билан соат 14:00 дан 16:00 га қадар ташқи ишлар вазири Абдулазиз Комилов Ўзбекистондаги ва хориждаги ҳамюртлар билан учрашув ўтказади ва уларнинг саволларига жавоб беради. Бу ҳақда ТИВ матбуот хизмати хабар берди.
Видеоконференция шаклида бўлиб ўтадиган тадбирда Ўзбекистоннинг хориждаги элчихоналари ва бош консулхоналари раҳбарлари иштирок этади.
Мулоқот доирасида Ўзбекистон ва чет эл ОАВ вакиллари қаршисида ўзбекистонликларнинг ТИВ фаолияти билан боғлиқ долзарб муаммолари кўриб чиқилади.
Ташқи ишлар вазирлигига тўғридан-тўғри мурожаат қилиш имконига эга бўлмаган Ўзбекистон фуқаролари матн, аудио ва видео кўринишдаги ўз саволларини вазирнинг виртуал қабулхонасига, muloqot@tiv.uz расмий электрон манзилига, шунингдек, ТИВнинг Facebook’даги расмий саҳифаси ва Telegram’даги каналга олдиндан жўнатишлари мумкин.
Аноним хатлар, одобсизлик мазмунидаги мурожаатлар (уятсиз ёхуд ҳақоратли иборалар, мантиқ ва маъноси бўлмаган таклифлар ва бошқалар), мурожаат матнида тушунарсиз қисқартиришлар мавжуд бўлган, таркибида аниқ аризалар, шикоятлар ёки таклифлар бўлмаган мурожаатлар кўриб чиқилмайди.
Мурожаатлар ушбу эълон чоп этилган вақтдан тадбир якунланганига қадар — 5 июль куни Тошкент вақти билан соат 16:00гача қабул қилинади.
Изоҳ (0)