Президент Шавкат Мирзиёевнинг Андижон вилоятига ташрифи давом этмоқда. Президент 3 июнь, шанба куни Андижон шаҳрида бўлиб, шаҳар ижтимоий инфратузилмасини ривожлантириш борасида бир қатор кўрсатмалар берди, деб хабар қилди ЎзА.
Жумладан, Шавкат Мирзиёев Андижон шаҳрида Республика ихтисослаштирилган кардиология ва Республика ихтисослаштирилган эндокринология илмий-амалий тиббиёт марказларининг филиалларини ташкил этиш, вилоят юқумли касалликлар шифохонаси, Андижон давлат тиббиёт институти клиникасини реконструкция қилиш ва замонавий жиҳозлаш ишларининг аҳоли саломатлигини сақлашдаги аҳамияти ҳақида алоҳида тўхталди. Бу хайрли ишларни тезлаштириш бўйича мутасаддиларга топшириқлар берилди.
Шунингдек, Андижон шаҳрида Универсал спорт мажмуасини қуриш, Муҳаммад Юсуф мактабини ташкил этиш, янги истироҳат боғи бунёд қилиш, тиббиёт масканларини капитал таъмирлаш лойиҳаларининг тақдимоти ўтказилди.
Маълумот учун, Ўзбекистон Халқ шоири Муҳаммад Юсуф 1954 йилда Андижонда туғилган. У бир қанча шеърий китоблар муаллифидир. 2001 йилда вафот этган шоирнинг шеърлари ҳозиргача таниқли хонандалар томонидан ижро этилади. Тошкент шаҳри ва Марҳамат туманидаги кўчалардан бири, шунингдек, Андижон шаҳридаги болалар кутубхонаси ва Марҳамат туманидаги санъат мактаби Муҳаммад Юсуф номи билан аталади.
Изоҳ (0)