Prezident Shavkat Mirziyoyevning Andijon viloyatiga tashrifi davom etmoqda. Prezident 3-iyun, shanba kuni Andijon shahrida bo‘lib, shahar ijtimoiy infratuzilmasini rivojlantirish borasida bir qator ko‘rsatmalar berdi, deb xabar qildi O‘zA.
Jumladan, Shavkat Mirziyoyev Andijon shahrida Respublika ixtisoslashtirilgan kardiologiya va Respublika ixtisoslashtirilgan endokrinologiya ilmiy-amaliy tibbiyot markazlarining filiallarini tashkil etish, viloyat yuqumli kasalliklar shifoxonasi, Andijon davlat tibbiyot instituti klinikasini rekonstruksiya qilish va zamonaviy jihozlash ishlarining aholi salomatligini saqlashdagi ahamiyati haqida alohida to‘xtaldi. Bu xayrli ishlarni tezlashtirish bo‘yicha mutasaddilarga topshiriqlar berildi.
Shuningdek, Andijon shahrida Universal sport majmuasini qurish, Muhammad Yusuf maktabini tashkil etish, yangi istirohat bog‘i bunyod qilish, tibbiyot maskanlarini kapital ta’mirlash loyihalarining taqdimoti o‘tkazildi.
Ma’lumot uchun, O‘zbekiston Xalq shoiri Muhammad Yusuf 1954-yilda Andijonda tug‘ilgan. U bir qancha she’riy kitoblar muallifidir. 2001-yilda vafot etgan shoirning she’rlari hozirgacha taniqli xonandalar tomonidan ijro etiladi. Toshkent shahri va Marhamat tumanidagi ko‘chalardan biri, shuningdek, Andijon shahridagi bolalar kutubxonasi va Marhamat tumanidagi san’at maktabi Muhammad Yusuf nomi bilan ataladi.
Izoh (0)