Канаданинг Альберта провинциясида истиқомат қилувчи Стивен Мартин орзусини севгилиси Кристин Питерс билан амалга ошириш мақсадида у билан бирга ҳаво шарида парвоз қилишга қарор қилади. Шу фурсатдан фойдаланиб қизга турмушга чиқиш таклифини билдирмоқчи бўлган. Бироқ романтик парвоз аянчли воқеа билан якунланишига оз қолди. Бу ҳақда ABC News’га таяниб, TJournal хабар берди.
Парвоз Эдмонтон шаҳридан узоқ бўлмаган майдонда бошланган. Ҳаво шарида Мартин ва Питерсдан ташқари яна бир нечта одам бўлган. Қурилма баландликка кўтарилганида эркак севгилисининг қўлига никоҳ узугини таққан ва турмуш қуриш таклифини билдирган. Питерс таклифга дарҳол рози бўлган.
Шундан сўнг 12 метр баландликдаги ҳаво шари тезлик билан пастлай бошлаган ва натижада дарахтга бориб урилган. Бироз вақтдан сўнг учувчи ҳаво шарини эсон-омон ерга қўндиришга муваффақ бўлган.
«Биз ердан 12 метр баландликда эдик ва бирдан ҳаво шаримиз тебраниб, шох-шаббаларнинг синаётганини эшитдик ва дарахтга бориб урилдик. Бу шу қадар тез рўй бердики одамлар ҳатто қўрқишга ҳам улгурмай қолди», — деди Мартин.
Мартиннинг сўзларига кўра, нохуш ҳодиса оқибатида олинган энг катта жароҳат — тирноғининг сингани. Эркак яна бир марта ҳаво шарида учишга тайёр эканлигини билдирган.
Изоҳ (0)